Өмнөд Солонгосын томоохон энтертайнмент компани болох HYBE-ийн охидын алдартай хамтлагууд болох LE SSERAFIM, ILLIT, KATSEYE нар хамтран шинэ дуу гаргахаар болжээ.

Уг хамтарсан дуу нь “ICONIC BY MISTAKE” нэртэй бөгөөд энэ сарын 12-ны өдөр Улаанбаатарын цагаар 11 цагт албан ёсоор бүх стриминг платформоор цацагдах юм.

HYBE-ийн зүгээс энэ төслийг “Гайхалтай гэнэтийн хамтрал” хэмээн тодорхойлж, гурван өөр үеийн, өөр хэв маягтай охидын хамтлагийг нэгтгэсэн онцгой уран бүтээл гэж онцолж байна.

LE SSERAFIM нь хүчтэй үзүүлбэр, өөртөө итгэлтэй хүчирхэг дүр төрхөөрөө алдартай. Тэдний тайзны энерги, хурц бүжиг дэглэлт, хүчтэй мессеж нь энэ хамтралын хамгийн хүчирхэг хэсэг болох юм.
ILLIT хамтлаг нь зөөлөн, эгдүүтэй дүр төрхөөрөө ялгардаг. Тэдний хөгжим илүү мелодик, хөнгөн бөгөөд сонсогчдод үлгэрийн уур амьсгал өгдөг.

Харин KATSEYE нь олон орны гишүүдтэй, олон улсын поп чиглэлтэй хамтлаг. Тэдний хэв маяг нь Y2K загвар, хурц үг хэллэг, хүчирхэг үзүүлбэртэй англи хэл дээрх поп дуугаар тодорхойлогддог бөгөөд дэлхийн зах зээлд чиглэсэн өнгө аястай хамтлаг. 

Энэхүү хамтарсан төсөл нь HYBE-ийн уран бүтээлчдийн олон талт өнгө төрх, хөгжмийн чиглэл хэрхэн хоорондоо уялдаж болохыг харуулах томоохон жишээ болж байна.

Фенүүдийн зүгээс “ICONIC BY MISTAKE” дууг гурван өөр дүр төрхийн огтлолцол дээр төрөх өвөрмөц уран бүтээл хэмээн өндөр хүлээлттэйгээр хүлээн авч байгаа бөгөөд албан ёсоор цацагдсаны дараа олон улсын хөгжмийн зах зээлд хүчтэй нөлөө үзүүлнэ гэж таамаглаж байна.

Мэдээллийг бэлтгэсэн:
Хүмүүнлэгийн ухааны их сургуулийн сэтгүүл зүй медиа технологийн II дамжааны оюутан Б.Энэрэл