БОАЖ-ын сайд Ц.Сандаг-Очир Төрийн ордонд сэтгүүлчдийн асуултад хариулав.   

-Би ажил авахад манай яам надад Туулын хурдны замын ажлыг танилцуулсан. Дүгнэлт нь гараагүй, ийм ийм хуулийг зөрчлөө гэсэн. Менежментийн төлөвлөгөөг батлаагүй байхад ажил эхлүүлсэн гэж үзэн тухайн компанид торгууль ногдуулна. Торгохоос өөр аргагүй. Техникийн нөхцөлөө авсны дараа барилга байгууламжийн ажил эхлэх ёстой байдаг.

Иймд ажлыг нь түр зогсоосон. Манай яам хуульд заасан хүрээнд хяналтаа тавина. Сөрөг нөлөө үүсэхээс урьдчилан сэргийлэх зорилгоор хяналт тавьдаг. Төсөл хөтөлбөрийг зогсоох гэж байна, гацаах гэж байна, дарамталлаа, шахалт үзүүллээ гэж болохгүй. 

Туулын хурдны зам төслийг түр зогсоох, эсвэл бүр зогсоох асуудал нь захиалагч гүйцэтгэгч талаас хамаарна. Хэрэв манай яамнаас тавьсан хуулийн шаардлагыг биелүүлэхгүй үл тоогоод байвал бүр зогсоохыг ч үгүйсгэхгүй. Би тийм нөхцөл байдал руу орно гэж бодохгүй байна. Өөрсдөө ажлаа явуулъя гэвэл хуульд нийцүүлэх хэрэгтэй.

Тэгвэл Байгаль орчны яам байгаад яах юм? Улсын байцаагч нарыг ажиллуулах хэрэг юу байгаа юм бэ? Хуулийг хэрэгжүүлэх гэж манай яам ажиллаж байна. Ажлаа хийсэн төрийн албан хаагч руу дайрч давшлах хэрэггүй. Иргэд Туул голоо, байгалиа хамгаалах гэж явааг ойлгоно гэв.