УИХ-ын Ёс зүйн дэд хорооны хурал 10:00 цагт товлогдсон. Хурлаар тус дэд хороонд 2026 оны нэгдүгээр улиралд ирсэн өргөдөл гомдлыг хэлэлцэх байсан юм. Тодруулбал, УИХ-ын гишүүн М.Нарантуяа-Наратай холбоотой 48 өргөдөл гомдол иржээ.

УИХ-ын гишүүн Нарантуяа-Нара "Троллуудын хүсэлтээр УИХ-ын Ёс зүйн дэд хороо хуралдах гэж байна. Намайг олон нийтийн сүлжээгээр бусдыг доромжилж нэр төрд халдсан, төрийн албаны нэр хүндийг унагаасан, өсвөр насны залууст сөрөг үлгэр дуурайл үзүүлсэн, УИХ-ын гишүүний нэр хүнд, эрх мэдэл, албан тушаалын байдлаа урвуулан ашиглаж бизнесийн байгууллагын бараа бүтээгдэхүүнийг сурталчилсан зэрэг агуулгатай гомдлууд ирсэн байна. Эдгээр 48 гомдлыг өөр өөр хүмүүс ирүүлсэн боловч үг үсэг, цэг, таслал нь яг ижилхэн байгаа юм.

Мөн эдгээр гомдлыг хараад үзэхэд, хүний өмнөөс гомдогсод маш олон байна.Тухайн хүн нь гомдоогүй байхад тэр хүний өмнөөс гомдогсод ирж өөрийгөө батлах байх гэж бодож байна. Тэгэхээр троллуудын хүсэлтээр Ёс зүйн дэд хороо хуралдах гэж байна. Ганцхан Нарантуяа Нараг авч хэлэлцэж байгаад нь Ёс зүйн дэд хороо байх ёстой эсэхэд эргэлзэхэд хүргэж байна" гэв.