4-р сарын 10-наас эхлэн Замын хөдөлгөөнд унадаг дугуй, скүтер, цахилгаан дугуй, мопед, мотоцикл оролцож эхэлнэ.

Гэвч талуудын эрх ашгийг хамгаалсан дүрэм, журам тодорхой биш байгаа, жил ирэх тусам осол гэмтлийн тоо өсөж байгаа учраас урьдчилан сэргийлэх ажлыг талуудтай хамтран зохион байгуулж байгаа зэрэг асуудлаар Хүний эрхийн Үндэсний Комисс, Тээврийн Цагдаагийн Албанаас мэдээлж байна.

04.10-наас дугуй, скүтер, цахилгаан дугуй, мопед, мотоцикл замын хөдөлгөөнд оролцож эхлэхтэй холбогдуулан иргэдийн зорчих эрх, нөгөө талаар явган зорчигчийн эрхэд анхаарал хандуулах хэрэгтэй байна.

явган зорчигчийн аюулгүй байдал, дугуй, скүтер, цахилгаан дугуй, мопед, мотоциклтой иргэд дүрмээ баримтлах асуудал чухал байна.

ХҮЭК аяны хүрээнд тээврийн цагдаагийн албанаас гаргасан журмын төслийг яаралтай батлахыг сануулж байна. 04.10-наас хөдөлгөөн нэмэгдэх үед журам ойлгомжгүй, журам байхгүй бол иргэдийн аюулгүй байдал зорчих эрх зөрчигдөж болзошгүй байдал үүснэ. 

Цахилгаан скүүтэр, мопед унахдаа хурд 20 км-с хэтрэхгүй байх, тоглоомын талбай, сургуулийн орчин, цэцэрлэгт хүрээлэн гэх мэт хүн ихтэй газраар зорчихгүй байх, тухайн тээврийн хэрэгслүүдийг хэрэглэж байх үедээ гар утсаа хэрэглэхгүй байх, гарцаар явахдаа түрж гарах нь өөрийн болон бусдын аюулгүй байдлыг хамгаалах юм.

16 нас хүрээгүй хүүхдэд Эцэг эхчүүд хүүхэддээ мопед, мотоцикл худалдаж авч өгч байгаа нь эрсдэлийг дагуулж байна.

Замын хөдөлгөөнд унадаг дугуй, скүтер, цахилгаан дугуй, мопед, мотоцикл нь явган зорчигчдод аюул дагуулж байгааг анхаарах хэрэгтэй.

Унадаг дугуйн замаар цахилган скүүтэр мопед зорчих боломжтой ба унадаг дугуйн зам байхгүй тохиолдолд зорчих хэсгийн баруун хөвөөгөөр явна. Харин явган хүний замаар зорчиж болохгүй.

2025 онд Цагдаагийн байгууллагад унадаг дугуй, мопед, скүүтэр, цахилгаан мопедтой холбогдсон 420 осол гарч үүнтэй холбоотойгоор 730 хүн хүнд болон хөнгөн хэлбэрээр бэртэл гэмтэл авсан. Үүнээс:

• Цахилгаан мопедтой холбоотой 191
• Цахилгаан мотоцикл буюу суррон 164
• Цахилгаан скүүтэр 65 осол бүртгэгдсэн. 

Бага насны хүүхдүүд цахилгаан мотоциклтой хамгийн их хөдөлгөөнд оролцож байгаа нь Хан-Уул дүүрэг байна. Үүнийг таслан зогсоох ёстой эцэг эхчүүд 10-15 сая төгрөгийн үнэтэй цахилгаан мотоциклыг хүүхдэдээ авч өгдөг. Гэмтэл Согогийн Үндэсний төвөөс ирүүлсэн мэдээллээр маш олон өсвөр насны хүүхдүүд цахилгаан дугуй, скүүтэр, цахилгаан мопедыг унаж гэмтэл бэртэл авч байна. Тэд ихэвчлэн гавал тархи, нуруу нугасандаа гэмтэл авч байна. Хүүхдүүд өөрсдөө гэмтэхээс гадна бусдыг гэмтээх эрсдэлтэй байгааг анхаарах хэрэгтэй.

Мөн эцэг эхчүүд сургууль цэцэрлэгт хүргэх зорилгоор бага насны хүүхдийг урдаа зогсоогоод цахилгаан скүүтэрээр явах тохиолдол маш их байна. Үүнд хатуу хяналт тавина. Цагдаагийн байгууллагаас аюулгүй байдлыг хангахын тулд сургуулийн орчимд эргүүл гүйцэтгэнэ.