МАХН-ын дарга М.Энхболд УИХ-ын даргад Д.Лүндээжанцанг нэр дэвшүүлсэн намынхаа шийдвэрийг өнгөрсөн баасан гаригт АН-ын дарга Ц. Элбэгдоржид хүргүүлжээ. АН-ын гүйцэтгэх зөвлөл, УИХ дахь зөвлөлтэйгөө өчигдөр хамтран хийсэн өргөтгөсөн хуралдаанаараа уг асуудлыг хэлэлцлээ. Тус нам Д.Лүндээжанцанг УИХ-ын даргаар томилох саналыг дэмжих боломжгүй гэж үзэж байгаа юм. УИХ-ын тухай хуульд зааснаар сонгуулийн үр дүнгээр парламентад олонхи бүрдээгүй бол хамгийн олон суудал авсан нам, эвслийн бүлэг бусад намтай зөвшилцөн УИХ-ын даргыг томилдог юм. Д.Лүндээжанцанг дэмжихгүй гэдгээ АН мэдэгдсэний дараа УИХ дахь МАХН-ын бүлгийн дэд дарга Б. Эрдэнэсүрэнгээс байр суурийг нь сонирхлоо.
-АН Д.Лүндээжанцанг дэмжихгүй гэдгээ мэдэгдлээ. Бүлэг өөр хүнийг нэр дэвшүүлэх үү?
-Үгүй, зөвшилцөл гэдэг тохиролцоо биш. Дээд шүүхийн тайлбарт ч дурьдсан байдаг. Бид АН-д саналаа хүргүүлсэн, тэд хариугаа өгсөн. Зөвшилцөл гэдэг ердөө л энэ. Эсрэг санал өгсөн ч, зөвшөөрсөн ч саналаа хүргүүлээд хариу ирүүлсэн бол зөвшилцөж байгаа нь энэ юм. Харин тохиролцоно гэсэн тохиолдолд өөр л дөө.
-Төрийн байгуулалтын байнгын хорооны хурлаар өнөөдөр (өчигдөр) энэ талаар хэлэлцэх байсан. Гэсэн ч хурал хойшилчихлоо. Юунаас болов?
-Улс оронд ийм уй гашуу тохиолдсон үед дарга томилно, томилохгүй гээд маргалдаж суух нь зохимжгүй гэж намууд ярилцсан.
-Бүлгийн хурлаар Айвенхоу майнзтай хийх тогтвортой байдлын гэрээний явцын талаар байсан, сонссон уу?
-Төлөвлөгөөнд тийм байсан ч цаг хүрэлцсэнгүй.
-Мэдээлэл өгөх хүмүүс уг нь ирсэн юм уу. Өнгөрсөн долоо хоногт АН-ынхан энэ асуудлаар мэдээлэл сонсох гэсэн ч тэд ирээгүй учир онцолж асуугаад байгаа юм?
-Ирсэн, ирсэн. Сангийн яамны Төрийн нарын бичгийн дарга Ч.Хүрэлбаатар, мэргэжилтнүүд гээд. Гэхдээ Төсвийн гүйцэтгэлийн талаар ярилцаад энэ талаар мэдээлэл сонсох цаг гарсангүй.
-Өнгөрсөн оны төсвийн гүйцэтгэлээр төсвийн зарлага 59 тэрбум төгрөгөөр хэтэрсэн. Төсвийн ерөнхийлөн захирагчдаас 21 нь баталсан төсвийг хэтрүүллээ. Үүнд бүлэг шүүмжлэлтэй хандаж байгаа юу?
-Хэтрэлт, хэмнэлтийн агуулгыг харахгүйгээр шууд тоо хараад дүгнэх нь учир дутагдалтай. Хэмнэсэн болгон сайн биш шүү дээ. Ажлаа хийгээгүйгээс төсөв хэмнэгдсэн байж болно. Зардал зэргийг хэмнэсэн бол сайн л байна. Үүнтэй адил хэтэрсэн болгон муу гэж хэлж болохгүй. Санхүүгийн нарийн асуудлыг сайн харж дүгнэх хэрэгтэй.

С.Сэлэнгэ