Монголын хөрөнгийн биржийн арилжаагаар дотоодын томоохон аж ахуйн нэгжийн үнэт цаасны ханшийн бууралт үргэлжилсээр байна. Уржигдар л гэхэд АПУ компанийн ханш бууралттай байсан бол өчигдөр НИК компанийнх буурсан байна. Энэ өдөр тус компанийн үнэт цаасны ханш 100 төгрөгөөр буюу таван хувиар унажээ.

ЗХУ-ын /хуучин нэрээр/ "Союзнефтьэкспорт" нэгдлийн төлөөлөгчийн газраас өөртөө ашиглагдаж байсан шатахуун, тосолгооны материал түгээх хэрэгслүүдийг манай улсад шилжүүлэн өгсөн байна. БНМАУ-ын Ардын Сайд нарын Зөвлөлийн 1941 оны хоёрдугаар сарын 28-ний өдрийн 215 дугаар тогтоол гарснаар нефть хангамжийн байгууллага анх бий  болсон аж.

1943 онд Тээврийн яамны харъяанд байгуулан ажиллуулсан Автонефтийн хэрэг эрхлэх газрын үйл ажиллагаа нь цаашид өргөжин, 1947 он гэхэд жилд 12450 тонн шатахуун, тосолгооны материалыг дөрвөн чиглэлээр худалдан авдаг болжээ. 1990онд төрийн удирдлагын бүтцэд өөрчлөлт гарч, аж ахуйн яамд татан буугдахад бие даасан Нефть импорт хангамжийн нэгтгэл байгуулагдаж, 1992 оноос БНМАУ-ын аж ахуйн нэгжийн хуулийн дагуу "Нефть Импорт Концерн" болгон дүрмийг нь Засгийн газрын 1992 оны 33 дугаар тогтоолоор баталжээ. Засгийн газрын Өмч хувьчлалын комиссын 1994 оны тавдугаар сарын 6-ны өдрийн 07 дугаар тогтоолоор Нефть импорт концернийг төрийн өмч давамгайлсан хувьцаат компани болгосон байна.

Гадаадын үйлдвэр компаниас 100 гаруй нэр төрлийн нефтийн бүтээгдэхүүн худалдан авч өөрийн 11 нефть бааздээр хүлээн авч, 13 нефть бааз 342 шатахуун түгээх станцад тээвэрлэн хүргэж худалдаалдаг хангамжийн байгууллага болжээ.