Засгийн газрын хуралдаан өчигдөр боллоо.

Хуралдаанаас орон даяар зуны цагийн тоололд энэ сарын 27-28 ны шөнө шилжих шийдвэрийг гаргалаа.

Цагийг ийнхүү зохиомлоор  өөрчлөх нь хүний эрүүл мэндэд сөргөөр нөлөөлж, био хэмнэл нь алдагдан улирлын чанартай өвчлөл үүсгэдэг хэмээн үздэг. Харин эдийн засгийн хувьд энэ нь эрчим хүчний хэмнэлттэй арга хэмжээ болдог юм. Дэлхийн улс орнуудад эдийн засгийн хэмнэлтийн талаарх олон судалгаа байдаг бол, манай улсад 1998 онд  хийсэн судалгаагаар зуны  цагийн тоололд   шилжих   4-9   дүгээр   сарын хооронд   байгалийн    гэрэлтэй    цагийг илүү ашигласнаар жилд дунджаар 23 орчим   сая   квт.цаг   цахилгаан   эрчим хүч хэмнэгддэг болохыг тогтоожээ. Мөн иргэд ажлаасаа эрт тарж, гэр бүлтэйгээ өнгөрүүлэх цаг нэмэгддэг нь таатай хэмээн үздэг.

Монгол Улс дэлхийн улс орнуудын жишгийн дагуу "Ажлын өдөрт өөрчлөлт оруулах тухай" Сайд нарын зөвлөлийн 1960 оны 245 дугаар тоот тогтоолоор анх удаа цаг урагшлуулах шийдвэрийг гаргаж байжээ. Улмаар 1985 оны 74 дүгээр тоот тогтоолоор жил бүрийн гуравдугаар сарын сүүлийн долоо хоногийн ням гаригаас эхлэн есдүгээр сарын сүүлчийн ням гараг хүртэл БНМАУ-ын нутаг дэвсгэрт цагийн тооллыг нэг цагаар урагшлуулан, ажил үйлчилгээний эхлэх цагийн хуваарийг хэвээр мөрдөж байсан юм. Энэхүү тогтоол нь 1999 оныг хүртэл 14 жил хэрэгжсэн бөгөөд 1999 онд хүчингүй болж, Засгийн газрын 2001 тогтоолоор дахин зуны цаг тооллыг мөрдөж эхэлсэн байдаг. Гэвч 2005 онд Засгийн газраас уг тогтоолыг дахин хүчингүй болгосон байна.

Ийнхүү олон удаа хүчингүй болгон, мөн сэргээж ирсэн энэ шийдвэр өөрөө тун маргаантай байдаг. Харин энэ удаа Засгийн газар эдийн засгийн бодит хэмнэлт гардгийг нь илүүд үзэн цагийг өөрчлөх шийдвэрт хүрсэн болов уу.

Цагийн өөрчлөлт есдүгээр сарын сүүлчийн долоо хоногийн баасан гарагаас бямба гарагт шилжих шөнийн 00 цаг хүртэл үргэлжилнэ.