Жил бүрийн 5 дугаар сарын 31-ний өдрийг “Дэлхийн тамхигүй өдөр” болгон дэлхий нийт тэмдэглэдэг уламжлалтай билээ.

Манай улсад тамхинаас үүдэлтэй хүн амын өвчлөл, нас баралт өндөр байна. Сүүлийн 10 жилд тамхинаас үүдэлтэй зүрх судасны эмгэгээр нас барах явдал хоёр дахин нэмэгдэж, нас барж байгаа гурван хүн тутмын нэг нь зүрх судасны эмгэг, таван хүн тутмын нэг нь хорт хавдрын улмаас нас барж байна гэсэн тоон үзүүлэлт гарсан. Эдгээр өвчлөлүүд нь бүгд тамхитай холбоотой юм.

Дэлхийн хэмжээнд хүн амын өвчлөл, нас баралтад нөлөөлж байгаа  зонхилох 10 эрсдэлт хүчин зүйлээс хамгийн түгээмэл, анхдагч эрсдэлт хүчин зүйлс нь тамхидалт юм.

2013 онд Монгол Улсад хийгдсэн Халдварт бус өвчин, осол гэмтлийн шалтгаан, эрсдэлт хүчин зүйлсийн тархалтын судалгаагаар, нийт хүн амын 27 хувь, үүнээс эрэгтэйчүүдийн 49 хувь, эмэгтэйчүүдийн 5 хувь нь тамхи татдаг байсан байна. Өөрөөр хэлбэл нийт хүн амын 5 хүн тутмын 1 нь, 2 эрэгтэй тутмын 1 нь тамхи татдаг байна.

Энэ жилийн Дэлхийн Тамхигүй өдрийг “БҮХ ТАМХИЙГ АДИЛХАН ХАЙРЦАГТАЙ БОЛГОЕ” уриан дор зохион байгуулж байна.  

Тамхины хяналтын суурь конвенцийн 11, 13-р зүйлд  улс орнуудад тамхийг адилхан хайрцагтай болгох үйл ажиллагаа тусгагдсан байдаг ба тамхины хяналт, тамхины хэрэглээг бууруулах цогц үйл ажиллагааны нэг хэсэг юм.

Иймд Дэлхийн эрүүл мэндийн байгууллага улс орнуудад дээрх арга хэмжээ авч тамхины хэрэглээгээ бууруулахыг зөвлөмж болгож байна.

Тамхийг адилхан хайрцагтай болгосноор тамхин бүтээгдэхүүний нөлөөг хэрэглэгчдэд бууруулах, тамхины зар сурталчилгааг хязгаарлах, тамхины хайрцаг дээрх эрүүл мэндийн анхааруулгын үр нөлөөг тодотгох ач холбогдолтой болно.

Энэ жилийн “Тамхигүй өдөр”-ийг тохиолдуулан Эрүүл мэнд, спортын яамнаас Монгол Улсын хүн амын дунд тамхины хэрэглээг бууруулах, ялангуяа хүүхэд, өсвөр үеийнхний тамхины хэрэглээг таслан зогсоох зорилгоор дор дурдсан үйл ажиллагааг зохион байгуулж байна. Үүнд: 

• Их, дээд сургуулийн оюутнуудад тамхины хор хөнөөлийн талаар  оюутануудад сургалт-мэдээлэл хийх
• Ерөнхий боловсролын сургуулийн нийгмийн ажилтануудад тамхинаас гаргах арга замууд, тамхины хяналтын тухай хуулийн  талаар  сургалт зохион байгуулах, аян зохион байгуулах
• Нийгмийн сүлжээгээр тамхины хор хөнөөл, тамхинаас гарах аргуудын талаар  контентууд цацах зэрэг ажлуудыг хийхээр төлөвлөж байна.