Сүхбаатар дүүргийн нутаг дэвсгэр дэх 20 дугаар хороо буюу хотын төвөөс 18 км алслагдсан бүсэд эрүүл агаарт тав тухтай 232 хүүхдийн багтаамжтай "Цасангоо" цэцэрлэг энэ сарын 6-нд үүдээ нээлээ.

Дүүргийн Засаг дарга, ЗДТГ хувийн хэвшлийг дэмжин ажилласнаар тус хорооны 400 гаруй сургуулийн өмнөх насны хүүхдүүд байдгийн тодорхой хувь нь ийнхүү цэцэрлэгт хамрах боломжтой болжээ.

Тус цэцэрлэгийн цогцолбор нь бүхэлдээ зөвхөн бяцхан үрсэд зориулагдсан бөгөөд тэдний хүмүүжилд онцгой нөлөө үзүүлэх бүжиг, дуугаар хичээллүүлж, оюуны боловсролд нь анхаарч, эрүүл ахуйн болоод олон улсын стандартыг хангасан хүүхдийн сурах таатай орчинг бүрдүүлж чаджээ.

Мөн хорооныхоо ажлын албатай хамтран амьжиргааны баталгаажих түвшингээс доогуур орлоготой 4 өрхийн хүүхдийг үнэ төлбөргүй сургахаар шийдвэрлэсэн байна. Эднийх өдрийн, 24 цагийн бага, дунд, ахлах бүлэг мөн өглөө, орой нэмэлт төлбөргүйгээр хүргэлтийн үйлчилгээтэйгээр хичээллэх гэнэ.

Цэцэрлэгийн нээлтэд Нийслэлийн Засаг дарга бөгөөд Улаанбаатар хотын Захирагч Э.Бат-Үүл, Сүхбаатар дүүргийн Засаг даргын орлогч Л.Амарзаяа, 20 дугаар хорооын Засаг дарга Р.Чогжмаа болон цэцэрлэгийн удирдлага, багш ажилчид, эцэг эхийн төлөөлөл оролцов.

Б.Туул