Монгол Улсын Ерөнхийлөгч Н.Энхбаярын урилгаар Бүгд Найрамдах Казахстан Улсын Ерөнхийлөгч Н.Назарбаев энэ сарын 6-7-ны өдрүүдэд Монгол Улсад Төрийн айлчлал хийх гэж байна. Айлчлал нь хоёр улсын хоорондын өргөн хүрээтэй түншлэлийн харилцааг цаашид эрчимжүүлэн хөгжүүлэх, Монгол Улс, БН Казахстан Улс хоорондын улс төрийн яриа хэлэлцээг дээд хэмжээнд үргэлжлүүлэх, хоёр орны хоорондын харилцаа, эдийн засгийн хамтын ажиллагааны өнөөгийн байдал, цаашдын чиг зорилтыг тодорхойлох, бүх талын хамтын ажиллагааны хөгжилд түлхэц өгөх зорилготой.

Айлчлалын үеэр Монгол Улсын Ерөнхийлөгч Н.Энхбаяр, БН Казахстан Улсын Ерөнхийлөгч Н.Назарбаев нар албан ёсны хэлэлцээ хийж, Монгол Улсын Ерөнхий сайд С.Баяр, УИХ-ын дарга Д.Лүндээжанцан нар БН Казахстан Улсын Ерөнхийлөгч Н.Назарбаевт бараалхан хоёр талын харилцаа, хамтын ажиллагааны асуудлаар санал солилцох аж. Айлчлалын үеэр Монгол, Казахстаны бизнес эрхлэгчдийн уулзалт болно.

Бүгд Найрамдах Казакстан Улсын Ерөнхийлөгч Нурсултан Абишевич Назарбаев намтар
Бүгд Найрамдах Казахстан Улсын Алма-Аты мужийн Каскелен дүүргийн Чемолган тосгонд 1940 оны 7 дугаар сарын 6-нд төрсөн.
-1967 онд Карагандагийн металлургийн комбинатын дэргэдэх үйлдвэрлэлийн дээд сургуулийг төгссөн
-1960 онд Караганда мужийн Темиртау дахь “Казметаллургстрой” трестэд ажилчнаар орж хөдөлмөрийн гараагаа эхэлсэн. Дараа нь 1965 – 1969 онд Карагандагийн металлургийн комбинатад гагнуурчин, диспетчер, ахлах гагнуурчнаар ажиллаж байсан.
-1969 – 1973 онд Караганда мужийн Темиртау хотын намын болоод залуучуудын байгууллагад ажилчин,
-1973 – 1977 онд Карагандагийн металлургийн үйлдвэрийн намын хорооны нарийн бичгийн дарга,
-1977 – 1979 онуудад Караганда мужийн намын хороонд нарийн бичгийн дарга,
-1979 – 1984 онд Казахстаны Коммунист намын Төв хорооны нарийн бичгийн дарга,
-1984 – 1989 онд Зөвлөлт Социалист Бүгд Найрамдах Казахстан Улсын Сайд нарын Зөвлөлийн дарга,
-1989– 1991 онд Казахстаны Коммунист намын Төв хорооны нэгдүгээр нарийн бичгийн дарга,
-1990.02 – 04 сар Зөвлөлт Социалист Бүгд Найрамдах Казахстан Улсын Дээд зөвлөлийн дарга,
-1990.04 сараас Бүгд Найрамдах Казахстан Улсын Ерөнхийлөгчийн албыг тус тус хийж байна.
-1991 оны 12 сарын 1-нд болсон бүх ард түмний анхдугаар сонгуулиас Бүгд Найрамдах Казахстан Улсын Ерөнхийлөгчөөр сонгогдсон бөгөөд 1995 оны 4 сард болсон бүх нийтийн санал асуулгаар Н.Назарбаевын Ерөнхийлөгчийн бүрэн эрхийг 2000 он хүртэл сунгасан байна.
-1999 оны 1 сар, 2005 оны 12 сард болсон Ерөнхийлөгчийн сонгуульд сонгогчдын 79,8 хувь, 91.5 хувийн саналыг тус тус авч БН Казахстан Улсын Ерөнхийлөгчөөр сонгогдсон байна.
Улс, ард түмний энх тайван, найрамдлыг бэхжүүлэх үйл хэрэгт оруулсан алдар гавъяаг нь үнэлж Н.Назарбаевыг олон орны өндөр, дээд шангалаар шагнажээ.
Эдийн засгийн ухааны доктор цолтой. Эхнэр, гурван охинтой.

Гадаад Хэргийн яамны ХМА