Манай сонины зөвлөлд хэд хэдэн хүн амаар болон бичгээр хандаж, нийгмийн халамжийн тэтгэврийн талаар тодруулга хийж, сониндоо нийтэлж өгөхийг хүссэн юм. Бид Улсын Нийгмийн халамжийн газрын халамж үйлчилгээний хэлтсийн ахлах мэргэжилтэн Д.Чойжилсүрэнтэй уулзаж, нийгмийн халамжийн тэтгэврийг хэнд, хэрхэн олгодог талаар тодруулга авснаа уншигч, захиалагч та нартаа толилуулж байна.

-Нийгмийн даатгалын болон халамжийн хуулиудад заасны дагуу ямар хүмүүст нийгмийн халамжийн тэтгэвээр олгох вэ?
-Таны хэлсэн хоёр хуульд заасны дагуу тэтгэвэр авах эрх үүсээгүй иргэн нийгмийн халамжийн тэтгэвэр авах эрхтэй. Үүнд:
1. Тэжээн тэтгэх үр хүүхэд, төрөл садангийн хүнгүй 60 ба түүнээс дээш настай эрэгтэй, 55 ба түүнээс дээш настай эмэгтэй,
2. Хууль ёсны тэжээн тэтгэгч нь ахмад настан, хөгжлийн бэрхшээлтэй иргэн бөгөөд тэдгээр нь дэмжлэг, туслалцаа үзүүлэх бололцоогүй нь тогтоогдсон 60 ба түүнээс настай эрэгтэй, 55 ба түүнээс дээш настай эмэгтэй,
3. 16 насанд хүрсэн одой иргэн,
4. Хөдөлмөрийн чадвараа 50 ба түүнээс хувиар алдсан 16 насанд хүрсэн хөгжлийн бэрхшээлтэй иргэн,
5. 16 хүртэлх насны 4 ба түүнээс дээш хүүхэдтэй, өрх толгойлсон 45 насанд хүрсэн эх, 50 насанд хүрсэн эцэг,
6. Тэжээгч нь нас барсан гэр бүлийн 18 хүртэлх насны хүүхэд...Ийм 6 нөхцөл, болзлыг хангасан хүмүүс нийгмийн халамжийн тэтгэвэр авна.

-Таны ярьснаар бол нэг ба хоёр дахь нөхцөл бүрдсэн ахмадууд ямар бичиг баримт бүрдүүлэх вэ?
- Халамжийн тэтгэвэр авахыг хүссэн өргөдөл, сум, хорооны Засаг даргын тодорхойлолт, 2 хувь цээж зураг,
- Иргэний үнэмлэх, хуулбарын хамт,
- Тэжээн тэтгэх үр хүүхэд, төрөл садангийн хүнгүй болохыг тогтоосон "Амьжиргааг дэмжих зөвлөл"-ийн шийдвэр,
- Нийгмийн даатгалын сангаас тэтгэвэр авах эрх үүсээгүй тухай, аймаг, сум, дүүргийн нийгмийн даатгалын хэлтэс “сумын нийгмийн даатгалын байцаагч” - ийн тодорхойлолт авчирна

-16 насанд хүрсэн одой иргэн тэтгэвэр авахдаа ямар бичиг баримт бүрдүүлэх вэ?
-Гурван бичиг баримт бүрдүүлнэ. Үүнд:
-Тэтгэвэр тогтоолгохыг хүссэн өргөдөл, сум, хорооны Засаг даргын тодорхойлолт, 2 хувь цээж зураг,
-Иргэний үнэмлэх, хуулбарын хамт
-Нийгмийн даатгалын сангаас тэтгэвэр авах эрх үүсээгүй тухайн аймаг, дүүргийн даатгалын хэлтэс “сумын нийгмийн даатгалын байцаагч”-ийн тодорхойлолт орно.

-Хөдөлмөрийн чадвараа 50 ба түүнээс дээш хувиар алдсан, 16 нас хүрсэн хөгжлийн бэрхшээлтэй иргэн тэтгэвэр авъя гэвэл ямар бичиг баримттай ирэх вэ?
-Өргөдөл, үнэмлэх, даатгалын байцаагчийн тодорхойлолтоос гадна хөдөлмөрийн чадвар алдалтын хувь, хэмжээ, хугацааг тогтоосон эмнэлэг, хөдөлмөрийн магадлах комиссын шийдвэрийг авч ирэх хэрэгтэй.

-Тэжээгч нь нас барсан гэр бүлийн 18 хүртэлх насны хүүхэд тэтгэвэр авахдаа ямар бичиг баримт бүрдүүлэхсэн бол..?
-Тэтгэвэр тогтоолгохыг хүссэн өргөдөл, сум, хорооны Засаг даргын тодорхойлолт, 2 хувь цээж зураг, тэжээгчийн нас барсны гэрчилгээ, хуулбарын хамт, нийгмийн даатгалын сангаас тэжээгчээ алдсаны тэтгэвэр авах эрх үүсээгүй тухай аймаг, дүүргийн Нийгмийн даатгалын хэлтэс, “Сумын нийгмийн даатгалын байцаагч”-ийн тодорхойлолт, 18 хүртэлх хүүхдийн төрсний гэрчилгээ, иргэний үнэмлэх хуулбарын хамт, 18 хүртэлх насны хүүхдийн эх, эцэг, «асран хамгаалагч, харгалзан дэмжигч»-ийн иргэний үнэмлэх, хуулбарын хамт. Эдгээр болно. Нийгмийн халамжийн тэтгэвэр олгох үйлчилгээнд хамрагдах хүсэлтэй иргэн холбогдох бичиг баримтаа бүрэн бүрдүүлэн сум, хорооны нийгмийн ажилтанд өгнө. Нийгмийн ажилтан халамжийн тэтгэвэр олгуулах шийдвэрийг гаргуулах арга хэмжээг авах учиртай.

-Тодруулга өгсөнд баярлалаа.

Ч.Содномдорж