ОХУ-ын ерөнхийлөгч Владимир Путин баасан гарагт Оросын хяналтад байгаа Луганск муж дахь сургуулийн дотуур байранд гарсан халдлагад Украиныг буруутгав. 

Энэ халдлагаар зургаан хүний амь үрэгдсэн бөгөөд Путин хариу арга хэмжээ авна гэдгээ анхааруулж, армидаа хариу арга хэмжээ авах хувилбар боловсруулахыг үүрэг болгосон гэв.

Путин "Украины тал юу онилж байгаа гэдгээ сайн мэдэж байгаа" гэдгийг онцолжээ. 

Оросын төрийн телевизээр дамжуулсан мэдэгдэлдээ Путин "Дотуур байрны ойролцоо цэргийн болон тагнуулын ямар ч байгууламж байгаагүй.

Энэ нь санамсаргүй цохилт биш. Нэг байг нийт 16 дроноор онилсон” хэмээн ярив. 

Украин улс Луганск мужийг эргүүлэн авах зорилготой байгаа бөгөөд Москва 2022 онд Украины дөрвөн мужийг нэгтгэн авснаа зарласан ч Киев үүнийг хууль бус гэж үздэг.

Украины ерөнхийлөгч Володимир Зеленський өнгөрсөн долоо хоногт Киев хотын орон сууцны барилга Оросын пуужингийн цохилтод өртөж 24 хүн түүний дотор гурван хүүхэд амиа алдсаны дараа “хариу арга хэмжээ авна” хэмээн мэдэгдэж байсан юм.

Эх сурвалж: Reuters