Хүнс, хөдөө аж ахуй, хөнгөн үйлдвэрийн сайд Ц.Идэрбат нийслэлд нөөцийн мах нийлүүлж буй есөн аж ахуйн нэгжийн удирдлагуудтай уулзаж, нөөцийн махны өргөтгөсөн худалдаа болон сүлжээ дэлгүүрүүдэд хийж буй нийлүүлэлт, түгээлтийн явцыг шалгаж, холбогдох үүрэг чиглэл өглөө.

Тэрээр, "Урьдчилан хэлэлцэж зохион байгуулалтаа хийсэн атал нөөцийн махны хүргэлт сүлжээ дэлгүүрүүдэд дутуу хүргэгдсэн, өргөтгөсөн худалдааны зохион байгуулалтын улмаас иргэдийг урт дараалалд оруулж, чирэгдэл учруулж байна. Цаашид нөөцийн махны түгээлтэд хариуцлагагүй хандвал хариуцлага тооцно" гэв.

Мөн нөөцийн махны өргөтгөсөн худалдааг өнөөдрөөр дуусгавар болгож, “Номин”, “М-Март”, “Миний дэлгүүр” сүлжээний нийт 81 салбарт маргааш өглөө гэхэд нөөцийн махны нийлүүлэлтийг бүрэн хүргэх үүргийг Улаанбаатар хотын ЗАА, холбогдох аж ахуйн нэгжүүдэд өглөө. 

Түүнчлэн сайд нөөцийн мах нийлүүлэх гэрээний хэрэгжилт, түгээлт, борлуулалт, эрүүл ахуйн хяналтад тогтмол анхаарч, хяналтыг эрчимжүүлэн ажиллахыг ХХААХҮЯ, МЭЕГ, Улаанбаатар хотын Захирагчийн ажлын албаны холбогдох албаныханд үүрэг болгож, өөрөө биечлэн хяналт тавьж ажиллахаа мэдэгдлээ.

Өнөөдөр нөөцийн махны өргөтгөсөн худалдаанд нийт нийт 12,568 тонн махыг худалдаанд нийлүүлээд байна. Үүнээс 8,822 тонн нь үхрийн мах, 3,746 тонн нь хонины мах байгаа бөгөөд Төв цэнгэлдэх хүрээлэн, Цамбагарав үйлчилгээний төв, Жуковын талбай, Алтжин Бөмбөгөр, Байгаль эх цогцолбор, Хангай хотхон зэрэг байршлуудаар дамжуулан иргэдэд борлуулж байна. 

Өчигдрийн хувьд дээрх цэгүүдэд 5.5 тонн хонины мах, 9.1 тонн үхрийн мах буюу нийт 14.6 тонн нөөцийн мах борлуулжээ.

Эх сурвалж: Хүнс, хөдөө аж ахуй, хөнгөн үйлдвэрийн яам