Монгол Улсын нэгдсэн төсвийн 2027 оны төсвийн хүрээний мэдэгдэл, 2028-2029 оны төсвийн төсөөллийн тухай хуулийн төслийг УИХ хэлэлцэж эхэллээ.

Ирэх гурван жилийн эдийн засгийн өнгийг тодорхойлох эдгээр хуулийг баталсны дараа буюу намар 2027 оны улсын төсвийн тухай хуулийг батална. Уг нь улсын төсөв хөгжлийг буюу хөгжилд хөтлөх төслүүдийг санхүүжүүлэх учиртай. Үүнд эрчим хүч, дэд бүтцийн, инновац, технологи шингэсэн төслүүд хамаарна. Гэвч манай улсын төсвийн дийлэнхийг урсгалд зардалд зарцуулсаар байна. 

Энэ оны улсын төсвийн нийт зардал 33 их наяд төгрөг. Үүний 24.9 их наяд төгрөг буюу дийлэнхийг урсгал зардалд (төрийн албан хаагчдын цалин, урамшуулал, цахилгаан, дулааны төлбөр зэрэгт) зарцуулна. Энэ онд зөвхөн нийгмийн даатгал, хүүхдийн мөнгө, тэтгэвэр, тэтгэмжид нийт 9.2 их наяд төгрөг төсөвлөжээ. 

Харин хөрөнгө оруулалтад ердөө 8.5 их наяд төгрөг зарцуулна. Энэ дүр зураг ирэх жилүүдийн төсөвт ч давтагдахаар байна. Улаанбаатар хот гэхэд л 2027 онд сургууль, цэцэрлэгийн хүрэлцээгүй байдлаа шийдэж, боловсролын салбарт шинэ барилгуудыг барихаар төлөвлөжээ.