Өнөөдөр /05.27/ Эдийн засгийн байнгын хорооны хуралдаанаар дараах асуудлыг хэлэлцлээ. 

• БНМАУ-ын Засгийн газарт эрх олгох тухай хууль хүчингүй болсонд тооцох тухай хуулийн төсөл /УИХ-ын гишүүн С.Цэнгүүн 2025.12.30-ны өдөр өргөн мэдүүлсэн, эцсийн хэлэлцүүлэг/
• “Монгол Улсын хөгжлийн 2027 оны төлөвлөгөө батлах тухай” Улсын Их Хурлын тогтоолын төсөл /Засгийн газар 2026.05.01-ний өдөр өргөн мэдүүлсэн, гурав дахь хэлэлцүүлэг/
• Улсын Их Хурлын гишүүн Г.Лувсанжамцаас Улсын Их Хурлын 2025 оны 57 дугаар тогтоолын хэрэгжилтийн талаар Засгийн газарт хандсан асуулгын хариуг хэлэлцэх
• Үндэсний хиймэл дагуул хөөргөх төслийн хүрээнд Монгол Улсад үр өгөөжтэй ашиглах боломжтой олон талт хэрэгцээ шаардлагад нийцсэн хиймэл дагуулын талаар судлан санал, дүгнэлт боловсруулах үүрэг бүхий ажлын хэсгийн санал, дүгнэлт

“Монгол Улсын хөгжлийн 2027 оны төлөвлөгөө батлах тухай” Улсын Их Хурлын тогтоолын төслийн хэлэлцэх үеэр УИХ-ын гишүүн С.Цэнгүүн: 
Өнөөдөр бидний хэлэлцэх зарчмын зөрүүтэй саналаар хөгжлийн төсвийг 2 их наяд төгрөгөөр нэмэгдүүлэх юм байна. Тэгэх санхүүгийн нөөц бий бидэнд юу. Үнэхээр баталлаа гэхэд гүйцэтгэл дээр ахиц гарах уу. 88 төслийг УИХ-ын гишүүд дэмжиж явуулаад, төлөвлөгөөнд оруулсан ч бодит байдалд буюу намар төсвөө хэлэлцэх үед төсвийг батлах чадамж Засгийн газарт байгаа юу. Хэрэв тийм бол бид "худлаа" төсөв батлах гээд байна шүү дээ. Тэгэхээр "мөрөөдлийн жагсаалт" тавьсан ч санхүүгийн нөөцгүйн дээр, эргээд хянах боломжгүй байдал үүсээд байна.

Сангийн яамны Төрийн нарийн бичгийн дарга Б.Анар: 
Энэ жилийн батлагдсан төсөвт 32,9 их наяд төгрөгийн зардлын дээд хязгаар бий. Үүний 75 хувь нь урсгал зардал үлдсэн нь гадаадын зээл тусламжийн санхүүжилт юм. Өргөн барьсан төсвийн хүрээний мэдэгдэлд дээд хэмжээ 32 их наяд төгрөг, Сангийн яамнаас хийсэн тооцооллоор боловсрол, эрүүл мэндийн салбарын цалин, тэтгэврийн нэмэгдлийг тооцоход хамгийн багадаа 3-3,5 их наяд төгрөгийг нэмэгдүүлэх хэрэгцээ шаардлага бий. Харин шинээр хэрэгжүүлэх хөрөнгө оруулалт байхгүй, одоо үргэлжилж байгаагаа төслүүдээ л дуусгах юм.  

Дэлгэрэнгүйг дараах видеоноос хүлээн авна уу.