Хан-Уул дүүргийн 89 дүгээр бага сургуулийн сурагчид сургуулийнхаа орчинд ном уншиж, чөлөөт цагаа өнгөрүүлэх шинэ номын сантай боллоо. “Хайр түгээх RAV4” аяны хүрээнд тохижуулсан энэ номын сан нь 2024 оноос хойших 13 дахь, 2026 оны дөрөв дэх “Шилэн номын сан” юм.

Бага насны хүүхдийн хувьд ном унших хүсэл төрсөн мөч бүрд нийтийн номын сан руу бие даан очих боломж тэр бүр байдаггүй. Харин өдөр бүр очдог сургууль дотроо номын сантай байх нь хүүхэд номтой илүү ойр байж, өөрийн сонирхлоор ном сонгон унших хамгийн энгийн боловч бодит боломжуудын нэг болдог.

Ийм боломжийг нэмэгдүүлэх зорилготой “Шилэн номын сан” төслийн ээлжит тохижилт Хан-Уул дүүргийн 89 дүгээр сургуульд дууслаа. Тус сургууль бага сургууль тул шинэ номын сангийн хүртээмж нь бага ангийн сурагчдад шууд хүрч байгаагаараа энэ удаагийн ажлын онцлог болж байна.

Өдөр бүрийн орчинд нь номыг ойртуулав

Сургуулийн номын сан гэдэг зөвхөн ном хадгалдаг өрөө биш. Хүүхэд завсарлага, чөлөөт цаг, хичээлийн дараа орж ном сөхөх, зурагт ном үзэх, сонирхсон сэдвээ хайх боломжтой орчин байх нь унших дадлыг багаас нь бий болгоход чухал.

Ялангуяа бага ангийн хүүхдүүдийн хувьд ном унших дадал, сонирхол төлөвшиж эхэлдэг энэ үед “ном хаанаас олох вэ?” гэдэг саадыг багасгах нь чухал. Сургуулийнхаа дотор номын сантай болсноор хүүхдүүд нийтийн номын сан хүрэхийг хүлээлгүйгээр өөрсдийн өдөр тутмын орчиндоо номтой нөхөрлөх боломжтой болж байна.

“Хайр түгээх RAV4” аян 13 дахь номын сангаа тохижууллаа

Мөнххада ХХК-ийн “Хайр түгээх RAV4” аян 2024 оноос “Шилэн номын сан” төслийг хэрэгжүүлж эхэлсэн. Хан-Уул дүүргийн 89 дүгээр сургуулийн номын сан ашиглалтад орсноор аяны хүрээнд тохижуулсан сургуулийн номын сангийн тоо 13-д хүрлээ.

Мөн энэ нь 2026 онд тохижилтын ажлаа дуусгасан дөрөв дэх “Шилэн номын сан” болж байгаа юм. Төслийн хүрээнд сургуулийн номын сангийн орчныг илүү тав тухтай, хүүхэд ном уншихад таатай байдлаар шинэчлэхэд анхаарч байна. Төслийн хүрээнд номын санг:

• Хүүхдэд аюулгүй, энгийн тохижилттой,
• Уншлагын танхим нь ил тод харагдах шилэн ханатай,
• Сурагч бүрд нээлттэй, чөлөөтэй ашиглах боломжтой байхаар шийдсэн нь сургуулийн орчинд унших соёлыг илүү амьд болгохыг зорьсны илрэл юм.

Ном унших орчинд оруулсан хөрөнгө оруулалт үр дүнгээ шууд харагдуулдаггүй байж болох ч урт хугацаандаа хүүхдийн сэтгэлгээ, хэл яриа, бие даан суралцах чадварт нөлөөлдөг. Тиймээс “Шилэн номын сан” төсөл нь барилга байгууламжийн тохижилтын ажил гэхээс илүүтэйгээр боловсролын орчны чанарын тухай асуудлыг дахин сануулж буй жишээ гэж хэлж болохоор байна.

Мөнххада ХХК-ийн зүгээс “Хайр түгээх RAV4” аянаа үргэлжлүүлэн, 2026 ондоо багтаан Завхан, Өвөрхангай, Сэлэнгэ аймагт ерөнхий боловсролын сургуулийн дөрвөн номын санг шинэчлэн тохижуулах төлөвлөгөөтэй аж.