Монголын урчуудын эвлэлийн гишүүн, зураач Ш.Баатар, Б.Шатарсайхан нарын хамтарсан "Найртай сайхан" уран бүтээлийн үзэсгэлэн Г.Занабазарын нэрэмжит Дүрслэх урлагийн музейн үзэсгэлэнгийн танхимд нээлээ. 

Үзэсгэлэн энэ сарын 23-наас ирэх сарын 3-ныг хүртэл үргэлжлэх бөгөөд нийт 60 гаруй уран бүтээл дэлгэжээ. Үүнд хоёр уран бүтээлчийн өөрсдийн бүтээлүүдээс гадна хонины ноосоор хамтран урласан эсгий зургууд багтсан байна.

"Найртай сайхан" үзэсгэлэнгээрээ дамжуулан эх нутаг, унаган байгаль, өв соёлоо хайрлан хамгаалах үзэл санааг түгээхийн зэрэгцээ гэр бүлийн хайр, амар амгаланг мэдрүүлэхийг хоёр уран бүтээлч зорьжээ.

Монголын урчуудын эвлэлийн гишүүн, Монгол зургийн зураач Ш.Баатар уран бүтээлдээ өвөг дээдсээс өвлүүлсэн эх орон, байгаль дэлхийгээ хайрлах сэтгэлийг илэрхийлдэг байна. Тэрээр 1992 онд анхны бие даасан үзэсгэлэнгээ Монголд гаргаж, улмаар Голланд, Франц, БНСУ-д бие даасан үзэсгэлэнгээ дэлгэн, олон улсын болон дотоодын хамтарсан үзэсгэлэнд тогтмол оролцож иржээ. Түүний бүтээлүүд АНУ-ын Сан Франциско хотын Азийн урлагийн музей болон дотоод, гадаадын цуглуулагчдын сан хөмрөгт хадгалагддаг ажээ. 

Харин МУЭ-ийн гишүүн, зураач Б.Шатарсайхан 1993 оноос модон барын цуврал бүтээлээр уран бүтээлийн гараагаа эхэлж, 2008 онд орчин үеийн хэллэгтэй чимэглэлийн бүтээлүүдээрээ бие даасан үзэсгэлэн гаргаж байжээ. Тэрээр Монгол болон гадаадын олон үзэсгэлэн, уран бүтээлийн воркшопуудад оролцож ирсэн бөгөөд бүтээлүүддээ амьдралын гэрэл гэгээ, баяр бахдалыг тод өнгөөр илэрхийлдгээрээ онцлогтой юм байна.