АНУ-д 2001 оны есдүгээр сарын 11-нд болсон террорист халдлагаас хойш өнөөдөр буюу 2026 оны есдүгээр сарын 11-нд 25 жил болж байна.

2001 оны энэ өдөр “Аль-Каида” бүлэглэлийн 19 гишүүн дөрвөн зорчигч тээврийн онгоцыг барьцаалж, зохион байгуулалттай халдлага үйлдсэн юм. Хоёр онгоц Нью-Йорк хотын Дэлхийн худалдааны төвийн ихэр цамхгийг мөргөж, гурав дахь онгоц Вашингтон хотын ойролцоох Пентагонд унасан бол дөрөв дэх онгоц Пенсильванийн мужид сүйрсэн.

Халдлагын улмаас 2,977 хүн амиа алдсан /энэ тоонд халдлагыг үйлдсэн 19 террорист ороогүй/. Амиа алдсан хүмүүсийн дунд Дэлхийн худалдааны төв, Пентагонд ажиллаж байсан хүмүүс, онгоцны зорчигчид болон онгоц сүйрсэн газарт байсан хүмүүсээс гадна аврах ажиллагаанд оролцсон олон зуун гал сөнөөгч, цагдаа, онцгой байдлын ажилтан байжээ.

Жил бүрийн энэ өдөр юу болдог вэ?

АНУ даяар есдүгээр сарын 11-нийг халдлагын үеэр амиа алдсан хүмүүсийг дурсах өдөр болгон тэмдэглэдэг. Гол дурсгалын арга хэмжээнүүд Нью-Йорк дахь Дэлхийн худалдааны төвийн газар, Пентагон болон Пенсильванийн Шэнксвилл гэсэн халдлага болсон гурван газарт зохион байгуулагддаг.

Нью-Йоркт зохион байгуулдаг уламжлалт ёслолын үеэр амиа алдсан 2,977 хүний нэрийг ар гэрийнхэн нь ээлжлэн уншиж, тодорхой мөчүүдэд нэг минут чимээгүй зогсдог.

Мөн Манхэттэн дэх 9/11 Memorial-д Дэлхийн худалдааны төвийн ихэр цамхаг байсан газарт байгуулсан хоёр том усан сангийн эргэн тойронд хохирогчдын нэрийг сийлсэн байдаг. Энэхүү дурсгалын цогцолбор нь халдлагын хохирогчдыг дурсах гол газруудын нэг юм.

Харин энэ жил:

Энэ 25 жилийн ойгоор Нью-Йорк болон АНУ-ын бусад хотод дурсгалын ёслол, үзэсгэлэн, номын сангийн тусгай хөтөлбөр, гал сөнөөгч болон аврагчдын оролцоотой арга хэмжээ зэрэг олон үйл ажиллагаа болж байна.

Нью-Йоркт өнөөдрийн албан ёсны ёслолын үеэр хохирогчдын нэрийг уншихаас гадна долоон удаагийн чимээгүй зогсолт хийхээр төлөвлөжээ. Мөн “Tribute in Light” хэмээх хүндэтгэлийг гэрлийг дахин асааж, Дэлхийн худалдааны төвийн ихэр цамхгийн дүрсийг тэнгэрт бэлгэдлээр бий болгоно.

Харин АНУ-ын олон хотод 9/11-ийг зөвхөн дурсах бус, нийгэмдээ туслах өдөр болгон тэмдэглэх болсон. Тухайлбал, энэ жил олон нийт сайн дурын ажил хийх, хэрэгцээтэй хүмүүст зориулан хоол хүнс бэлтгэх зэрэг арга хэмжээнд оролцож байна.

9/11-ийн халдлага нь АНУ-ын түүхэнд төдийгүй дэлхийн улс төр, олон улсын аюулгүй байдал, терроризмтой тэмцэх бодлогод томоохон өөрчлөлт авчирсан үйл явдал болсон юм. Өнөөдөр 25 жилийн дараа ч халдлагын үеэр ажилласан аврагчид болон тухайн үеийн хохирогчдын эрүүл мэндийн урт хугацааны үр дагавар үргэлжилсээр байна.

Эх сурвалж: AP, CNN, Reuters