Мансууруулах эм, сэтгэцэд нөлөөт бодистой холбоотой 184 хэргийг 2026 оны есдүгээр сарын байдлаар шүүхэд шилжүүлсэн нь өмнөх оны мөн үеэс 33 хувиар өссөн байна.

Прокурорын байгууллагын мэдээллээр Эрүүгийн хуулийн 20.7 дугаар зүйлд заасан “Мансууруулах бодис, сэтгэцэд нөлөөт бодисыг хууль бусаар ашиглах”, 20.8 дугаар зүйлд заасан “Мансууруулах эм, сэтгэцэд нөлөөт бодис хэрэглэх орон байраар хангах” хэрэгт 398 хүнийг яллагдагчаар татжээ.

Улмаар 270 хүн холбогдох 184 хэрэгт яллах дүгнэлт үйлдэж, шүүхэд шилжүүлсэн байна.

Яллагдагчаар татагдсан 398 хүний 52 хувь нь 18-30 насныхан, 44 хувь нь 31-44 насныхан байна. Харин хүйсээр нь авч үзвэл 85 хувь нь эрэгтэй, 15 хувь нь эмэгтэй байжээ.

Прокурорын байгууллагаас энэ төрлийн гэмт хэргийн илрүүлэлт, шийдвэрлэлтийг нэмэгдүүлэх зорилгоор Нийслэлийн прокурорын газар, Хар тамхитай тэмцэх албатай хамтран ажиллаж, мөрдөн шалгах ажиллагааны чанар, үр дүнг дээшлүүлэх арга хэмжээ авч байгаа аж.

Эх сурвалж: Улсын Ерөнхий Прокурорын газар.