Улсын нийгмийн даатгалын ерөнхий газрын даргаар ажиллаж байсан, УИХ-ын гишүүн асан Ц.Сүхбаатар нарын дөрвөн хүнд холбогдох хэргийг Сонгинохайрхан дүүргийн шүүхээр хэлэлцээд хэргийг нь хэрэгсэхгүй болгохоор шийдвэрлэжээ.

УИХ-ын гишүүн асан Ц.Сүхбаатар УНДЕГ-ын даргаар ажиллаж байхдаа тус газрын Бодлого төлөвлөлтийн хэлтсийн даргаар ажиллаж байсан Ц.Дашдондог болон Б.Жаргалсайхан, Б.Ганбаатар нартай хамтран 1998 оны зургадугаар сарын 18-нд “Голомт” банкны салбарт байршуулсан тус газрын данснаас 100 сая төгрөгийг иргэн Д.Будангийн нэр дээр шилжүүлсэн, 2000 оны арваннэгдүгээр сарын 17-нд Худалдаа хөгжлийн банкин дахь тус газрын данснаас 220 сая төгрөг “Алтжин” компанийн данс руу, тус компанийн данснаас “Евро-Од” компанийн данс руу дамжуулан шилжүүлж, 77 сая төгрөгийг нь Б.Жаргалсайхан, Б.Ганбаатар нарт өгч, Нийгмийн даатгалын сангийн 320 сая төгрөгийг завшиж үрэгдүүлсэн.

Мөн дампуурсан ХОТШ, Сэргээн босголт банктай өр авлага барагдуулах гэрээ гэгчийг байгуулж, тус банкны эрх хүлээн авагч нараас шилжүүлсэн 2.3 тэрбум орчим төгрөгийн үнэтэй хөдлөх, үл хөдлөх хөрөнгийг Б.Жаргалсайхан, Б.Ганбаатар нар худалдах, барьцаанд тавих зэргээр үрэгдүүлсэн хэрэгт холбогджээ.

Дээрх хүмүүст Нийслэлийн прокурорын газраас Эрүүгийн хуулийн 150 дугаар зүйлд заасан итгэмжлэн хариуцсан этгээд хөрөнгөө завшиж үрэгдүүлсэн гэсэн үндэслэлээр яллах дүгнэлт үйлдсэн байж. Харин Сонгинохайрхан дүүргийн шүүх саяхан энэ хэргийг хэлэлцээд дээрх шийдвэрийг гаргасан гэнэ. Учир нь энэ хэргийг 2002 онд батлагдсан Эрүүгийн хуулиар зүйлчлэх ёсгүй, харин 1986 оны Эрүүгийн хуулиар зүйлчлэх нь зүйтэй гэж шүүгчид үзжээ. Улмаар уг хэргийн хөөн хэлэлцэх хугацаа 10 жил байсан бөгөөд 10 жил нь өнгөрсөн бол хариуцлагад татаж болохгүй гэж заасныг үндэслэсэн гэнэ.

Гэвч Ц.Сүхбаатар, Ц.Дашдондог, Б.Жаргалсайхан, Б.Ганбаатар нарын хувьд ногдох хөрөнгөөс 88 саяас дээш төгрөгийн хөрөнгө гаргуулж, УНДЕГ-т олгуулахаар шийдвэрлэсэн байна.

Н.Мөрөн