Сурагчдын элсэлтийн ерөнхий шалгалт болох гэж байгаатай холбогдуулан Боловсролын үнэлгээний төвөөс өчигдөр мэдээлэл хийлээ. Манай улсад жил бүр 40-өөд мянган сурагч элсэлтийн шалгалтад ордог байна. Өнгөрөгч онд 39728 сурагч элсэлтийн шалгалт өгсөн бол энэ хичээлийн жилийн эхний улиралд 33950 сурагч ЕБС-ийн 11 дүгээр ангид суралцаж байгаа гэсэн тооцоо гарчээ.

Боловсролын үнэлгээний төвөөс сурагчдад жишиг болгох үүднээс жил бүр элсэлтийн шалгалтын тестийн гарын авлага гаргадаг бөгөөд 2006-2010 оны элсэлтийн ерөнхий шалгалын бүх тестийг нэгтгэн ирэх даваа гаригаас эхлэн орон даяар тараахаар болжээ. 70 орчим мянган даалгавартай энэхүү гарын авлага 4500-6000 төгрөгийн үнэтэй аж.

Харин энэ онд шинээр бэлтгэж буй элсэлтийн шалгалтын 30 гаруй мянган тестийг МУИС, МУБИС-ийн эрдэмтэн багш нар боловсруулж байгаа юм. Гэрээ ёсоор 15 хоногийн дараа тест бэлэн болох бөгөөд Боловсролын үнэлгээний төвөөс ирэх сарын 1 гэхэд хэвлэн гаргахаар болжээ. Ингэснээр хими, биологи, газарзүй, монгол хэл, ангил хэл, математик, физикийн хичээлээр 100 мянган даалгавар бүхий дөрвөн багц эмхтгэл бэлэн болох юм.

Эдгээр даалгавраас санамсаргүй түүврийн аргаар сонгож, энэ жилийн элсэлтийн ерөнхий шалгалтыг авах юм байна. Тиймээс дээрх 100 мянган тесттэй бүрэн танилцсан сурагч элсэлтийн шалгалтад бүдрэхгүй байх боломжтой болох нь.

Сонирхуулахад, элсэлтийн шалгалтад бэлтгэх тестийн номнууд хуурамчаар хэвлэгдсэнийг илрүүлсэн бөгөөд нийслэлийн ерөнхий боловсролын 31,33,47 дүгээр сургуульд хууль бус ном тараагдсан байжээ.

М.Хангал