Өнөөдөр Эрүүл мэндийн хөгжлийн Үндэсний төвийн нээлттэй хаалганы өдөр. Эрүүл мэндийн хөгжлийн Үндэсний төв нь эрүүл мэндийн удирдах ажилтанг үе шаттайгаар бэлтгэх, давтан сургах, эрүүл мэндийн тулгамдсан асуудлуудыг судалж, салбарыг хөгжүүлэх загвар, чиглэл боловсруулах, эрүүл мэндийн байгууллагын үйл ажиллагааг төлөвлөх, шийдвэр гаргах түвшинд ажиллагсдыг шаардлагатай мэдээ болон зохих боловсруулалт дүгнэлт хийсэн мэдээллээр хангах үүрэгтэй байгууллага юм.

Мөн тус төвд Статистик мэдээллийн алба үйл ажиллагаагаа явуулдаг. Эндээс гаргасан зарим мэдээллүүдийг та бүхэнд хүргэе.

Манай улсын нийт хүн амын 48,7 хувь нь эрэгтэйчүүд, 51,3 хувь нь эмэгтэйчүүд байна. 15 хүртэлх насны хүүхэд 28,9 хувийг, 15-64 насны хүн ам 67 хувийг, 65-аас дээш насны хүн ам 4 хувийг тус тус эзэлж байна. Харин хүн амын дундаж наслалт 66,54 байгаагаас эрчүүдийн дундаж наслалт 63, эмэгтэйчүүдийн дундаж наслалт 70 байна.
Хүн амын өвчлөлийн тэргүүлэх таван шалтгаанд амьсгалын тогтолцооны өвчин, шээс бэлгэсийн тогтолцооны өвчин, бэртэл, хордлого бас бусад гадны шалтгаант үр дагавар, хоол шингээх эрхтэний өвчин, цусны эргэлтийн тогтолцооны өвчин орж байна. Харин нас баралтын эхний таван шалтгаанд амьсгалын тогтолцооны өвчин, хоол шингээх эрхтний өвчин, бэртэл хордлого, цусны эргэлтийн тогтолцооны өвчин, хавдар оржээ. Нэг их эмчид улсын дунджаар 352 хүн ноогдож байгаа бол жилд нэг иргэн амбулаториор 5 удаа үзүүлдэг тоо баримт гарсан байна.

Мөн та улсын бүртгэлд бүртгүүлсэн эмийн талаарх мэдээллийг http://www.moh.mn/ сайтаас авч болох юм. Эндээс та хуурамч эм, гаж нөлөө үзүүлсэн эмийн талаар, улсын бүртгэлд эм бүртгүүлэхэд шаардагдах баримт бичгүүдтэй, эм эмнэлгийн хэрэгслийн тухай хууль, дүрэмтэй танилцаж болох юм.

О.Ариунбилэг /ariunbileg@gogo.mn/