Нидерланд улсын Утрехт хотын Шинжлэх ухааны паркт байрлах "Danone Nutricia Research" төвд олон улсын нярайн болон хүүхдийн эмч нарт зориулсан эрдэм шинжилгээний хурал зохион байгуулагдлаа. Тус хуралд “Бага насны хүүхдийн хоол тэжээл – Микробиотик бүлэг ба тэдгээрийн гэдэсний микробиомд үзүүлэх нөлөө” зэрэг судалгааны ажлын үр дүнг танилцуулсан бөгөөд Монгол улсаа төлөөлөн "Нано Интернэйшнл" ХХК-ийн медикал менежер, их эмч Д.Одсүрэн, ЭХЭМҮТ болон ЭНЭМҮТ-н нярайн тасгийн эрхлэгч эмч Л.Ролзодмаа, Ч.Батням нар зочлон оролцлоо.

Danone Nutricia судалгааны төв нь Данон группийн “Specialized Nutrition” буюу хүүхдийн болон эмчилгээний зориулалттай тусгай хоол тэжээлийн дэлхийн хамгийн том судалгаа, хөгжүүлэлтийн төвүүдийн нэг юм. Тус төвд 700 гаруй олон улсын эрдэмтэн, биологич, хоол зүйчид ажилладаг бөгөөд бүтээгдэхүүнийг анхны санаанаас эхлэн зах зээлд нэвтрэх хүртэлх бүхий л үе шатны судалгаа, хөгжүүлэлтийг цогцоор нь хэрэгжүүлдэг.

Мөн ML-I болон ML-II түвшний лабораториудад биотехнологи, микробиологи, молекул биологийн нарийн судалгаа, туршилтууд хийгддэг бөгөөд хоол тэжээл хүний дархлаа болон гэдэсний микробиомд хэрхэн нөлөөлж буйг эсийн түвшинд судалдаг байна. Энэхүү эрдэм шинжилгээний хурлын үеэр зочид төлөөлөгчид тус лабораторийн үйл ажиллагаатай мөн танилцжээ.

Түүнчлэн Utrecht их сургуулийн эмнэлэгтэй (UMC Utrecht) хамтран байгуулсан NCRU (Nutritional Clinical Research Unit) клиникийн нэгжийн үйл ажиллагаатай танилцаж, хүнс болон шим тэжээлийн бодисууд хүний биед хэрхэн шингэж, нөлөөлж буйг эмнэлзүйн хяналттай орчинд судалж буй клиникийн туршилтын талаар сонирхолтой мэдээлэл авсан байна.

Судалгааны талаар тоймлон хүргэвэл:

• Эхийн сүүний олигосахарид (HMO) ба Сүүний бүтэц онцлог: Эхийн сүүнд байдаг дархлаа дэмжигч HMO (Human Milk Oligosaccharides)-ийн бүтцийг лабораторийн аргаар симуляци хийж, нярайн тэжээлд пребиотик нэгдэлтэй хамт (ScGOS/lcFOS) хослуулан хүүхдийн гэдэсний микробиомыг дэмжих том нээлтийг хийжээ;
• Сүүний уургийн харшлын судалгаа (Hypoallergenic research): Хүүхдэд тохиолдох үнээний  сүүний уургийн харшлыг анагаах, урьдчилан сэргийлэх гидролизжуулсан уураг болон амин хүчлийн суурьтай тэжээлийн клиникийн судалгаануудыг Утрехтэд голлон гүйцэтгэдэг талаар;
• Хүнс ба Дархлааны чийрэгжилт (Nutrition and Immune Fitness): Нидерландын Шинжлэх ухааны судалгааны байгууллагатай (NWO) хамтран хийсэн хүнсний шим тэжээл нь хүний дархлааны системд хэрхэн нөлөөлдөг, харшлаас хэрхэн сэргийлдэг тухай томоохон 4 төслийг амжилттай хэрэгжүүлсэн; 
• Iron Up! Project 2026: Danone Nutricia нь дэлхийн 5 хүртэлх насны хүүхдүүдийн 40 орчим хувьд нөлөөлж буй төмөр дутагдалтай холбоотой цус багадалттай (IDA) тэмцэх зорилготой “Iron Up!” олон улсын төслийг танилцуулсан. Энэхүү төсөл нь хүүхдийн өсөлт, тархины хөгжлийг дэмжих, цус багадалтыг бууруулахад чиглэж байна.