Цагдаагийн байгууллагад “Наадмын тасалбар зарна гэх зарын дагуу холбогдоод залилуулчихлаа” гэх дуудлага мэдээлэл энэ сарын 1-нд иржээ.

Тодруулбал иргэн А нь цахим орчинд нийтэлсэн “Наадмын тасалбар зарна” гэх зар мэдээллийн дагуу бусадтай холбогдож 6 ширхэг тасалбар авахаар 2 сая 200 мянган төгрөг шилжүүлэн залилуулсан байна.

Үндэсний их баяр наадам болох гэж байгаатай холбогдуулан иргэдийн хэрэгцээ, шаардлагад тулгуурлан залилах гэмт хэрэг үйлдэх болжээ. Иймд иргэд та бүхэн:

• Баталгаагүй цахим хаяг, хувь хүнтэй холбогдож тасалбар авахгүй байх,
• Урьдчилгаа төлбөр шилжүүлэхгүй байх,
• Найдвартай эсэхийг сайтар баталгаажуулахыг цагдаагийн байгууллагаас зөвлөж байна.

Хэрэв сэжигтэй зар мэдээлэлтэй таарсан, эсвэл залилангийн хохирогч болсон бол нотлох баримтаа хадгалж, цагдаагийн байгууллагад яаралтай хандана уу.

Эх сурвалж: ЦЕГ