Ерөнхий сайд Н.Учрал, Засгийн газрын гишүүд хөрөнгө оруулагч, бизнес эрхлэгчдэд "Эрх чөлөөний дөрвөн зам - дөрвөн чөлөөлөлт"-ийн бодлогоо танилцуулж байна.

Тэрээр, Нийгмийн даатгалын шимтгэлийн өртэй 23,489 дансыг бид чөлөөлсөн. Ингэснээр богино хугацаанд 1.7 тэрбум төгрөгийн нийгмийн даатгалын шимтгэл эргэн төлөгдсөн байна. 

Төр аж ахуйн нэгжүүддээ буюу иргэддээ итгэж чадвал тодорхой үр дүнд хүрдэг болохыг компаниудын дансыг чөлөөлсөн шийдвэрээс харж болно.

Мөн 360 зөвшөөрлийн листийг гаргаад, үүнээс бусад төрлийн үйл ажиллагаа чөлөөтэй гэсэн хуулийг баталсан хэдий ч хоёр жил хүрэхгүй хугацаанд 21 зөвшөөрөл нэмэгдэн 381 зөвшөөрөл буюу төрийн хүнд суртал улам нэмэгдсэн байсан.

Зөвшөөрөл гэдэг үгийг янз бүрээр нэрлэдэг. Бүртгэл гэсэн мөртөө зөвшөөрөл шиг хүнд сурталтай, чөдөр тушаа болж байсан үйл ажиллагаануудыг зогсоох ёстой тул "Зөвшөөрлийн хууль"-ийг бүрэн хэрэгжүүлж эхэлж байна.

Хувийн хэвшил хөдөлмөрлөж бүтээж байгаа аж ахуйн нэгжүүдийн төвлөрсөн, төлөвлөгөөт шалгалтыг чөлөөлөх ёстой гэж үзсэн. Иймд 7029 шалгалтаас баялаг бүтээгч нарыг чөлөөлсөн.

Хуулийн дагуу, тогтвортой үйл ажиллагаа явуулж байгаа компаниудад төлөвлөгөөт шалгалт байнга хийгддэг. Ийм байх шаардлага байхгүй. Эрүүл мэнд, байгаль орчинд сөргөөр нөлөөлөхүйц гомдол гараагүй тохиолдолд төр үргэлж очиж хяналт, шалгалт хийдэг байдлыг болиулна.

Бага орлоготой иргэдэд орон сууцныхаа 50 хувийг ипотекийн зээлээр худалдан авч, үлдсэн төлбөрөө төлөх хүртэл түрээслээд амьдрах боломж олгоно.

Гангийн цогцолбор, зэс боловсруулах цогцолбор, алт цэвэршүүлэх үйлдвэр, хөнгөн цагааны аж үйлдвэрийн парк, газрын тосны үйлдвэрийн цогцолборууд, нүүрс пиролизийн үйлдвэрийн үйл ажиллагааг эхлүүлнэ. Шаардлагатай дэмжлэгийг Засгийн газраас үзүүлж ажиллана. 

Монгол Улс 2025 онд сая тонн ган хэрэглэсэн. Энэ тоо 2030 он гэхэд 1.7 сая тонн хүрч өсөх төлөвтэй байна. Гангийн үйлдвэр дотоодын хэрэгцээний 70 орчим хувийг хангаж, импортын хамаарлыг бууруулна.