ОХУ-ын ерөнхийлөгч В.Путин өнгөрсөн пүрэв гаригт “В.Путинтай шууд ярилцлага” нэртэй телевизийн шууд нэвтрүүлэгт оролцож, иргэдийн сонирхсон асуултад хариулсан.

12 дахь удаагийн шууд ярилцлага 3 цаг 48 минут үргэлжилсэн байна. Иргэд Ерөнхийлөгчид тавих асуултаа мессеж, цахим хуудсаар дамжуулан, түүнчлэн видео форматаар илгээх боломжтой байлаа.

Энэ удаагийн шууд ярилцлагад хоёр сая орчим асуулт ирсэн гэж эх сурвалжууд мэдээлсэн юм.

Шууд ярилцлагын үеэр АНУ-ын тагнуулын нууцыг дэлгэсэн Эдуард Сноуден асуулт асуусан нь онцгой анхаарал татсан юм.

Тэрбээр веб камераар дамжуулан ОХУ олон сая хүний мэдээллийг олж авах, цуглуулах, дүн шинжилгээ хийдэг эсэх талаар, олон нийтэд ингэж хяналт тавих нь хэр шударга, үндэслэлтэй талаарх байр сууриа хуваалцахыг Путинээс хүссэн юм.

“ОХУ-д тусгай албад, тусгай төхөөрөмж хэрэглэх түүний дотор утасны яриа чагнах, интернэтээр мөрдөн мөшгөх зэргийг зохицуулсан хатуу хууль журам байдаг. Тэр зохицуулалтаар тодорхой хүнийг шалгахын тулд хуулийн байгууллагаас зөвшөөрөл авах шаардлагатай. Тиймээс олныг хамруулсан тагнуул, тандалт манай улсад байхгүй, хуулийн дагуу ч байх ёсгүй” хэмээн Ерөнхийлөгч Путин хариулсан байна.

Эдвард Сноуден тагнуулын ажиллагааны асуудлыг дахин нээлттэй хэлэлцүүлэхийн тулд ОХУ-ын Ерөнхийлөгчид ийм асуулт тавьснаа Их Британийн The Guardian сонинд илгээсэн захидалдаа бичжээ.

Харин Путин олон нийтийг хянах нь хэр шударга, үндэслэлтэй талаарх асуултад хариулахаас зайлсхийсэн гэж Сноуден мэдэгдсэн байна.