Төрийн ордонд ойн салбарын үндэсний чуулган үргэлжилж байна. Чуулганы үдээс хойших цагт ойн салбарын асуудал болон шийдлийг хэлэлцэж эхэллээ.

Хэлэлцүүлэгт БОАЖ-ын сайд Б.Бат-Эрдэнэ, Сангийн яамны Төрийн нарийн бичгийн дарга Ж.Ганбат, БХБ-ын дэд сайд Э.Золбоо, ХХААХҮЯ-ны Төрийн нарийн бичгийн дарга Т.Жамбалцэрэн, ШУА-ийн Ботаникийн цэцэрлэгт хүрээлэн, академич Ч.Доржсүрэн, “Тэрбум мод” сангийн удирдах зөвлөлийн гишүүн Р.Мөнхтуяа нар оролцож байна.

Оролцогчдоос асуулт сонсож холбогдох албаныхан хариулж байна.

Гавьяат эдийн засагч Б.Осоргарав "Хөдөөгийн хөгжлийн яам байгуулах нь зүйтэй гэж би өмнө нь мэдээлж, уриалга дэвшүүлж байсан. Үүнийг би Монголын гурван тулгуурт санаачилга гэж боддог" гэлээ.

Увс аймгийн Ханхөхийн нурууны улсын тусгай хамгаалалттай газар нутгийн захиргаанаас оролцож буй төлөөлөл:

-Надад санал байна. Модыг маш ихээр тарьж байгаа. Үүнээс гадна цөлжсөн, булаг шандны эх газруудыг ойжуулж байгаа ч эргээд эзэнгүйдэж байна. Нэгэнт “Тэрбум мод” гээд том хөдөлгөөн өрнүүлчихсэн юм чинь үүний ард 10 мянга, 100 мянган ажилтантай байхаар зохицуулалт хийхэд зорих хэрэгтэй байна. Бид ойжуулаад л орхино, ингээд үндсэн ажлаа хийгээд явна. Тэр моддыг арчилж, үржүүлэх хүн шаардлагатай байна.