Манай улсын хүн амын 51,4  хувийг эмэгтэйчүүд, 48,6 хувийг эрчүүд эзэлж байна. Хүн амынхаа тал хувийг эзэлж байгаа эрчүүдийн эрх ашгийн тухай тун бага ярьж байгаад холбогдох байгууллагынхан сэтгэл дундуур явдгаа өнөөдөр илэрхийллээ.

Монголын эрэгтэйчүүдийн холбооноос санаачлан маргааш “Бишрэлт” зочид буудалд “Эрэгтэйчүүдэд тулгамдаж буй асуудал” онол, практикийн хурал дээр энэхүү асуудлын талаар хэлэлцэх юм байна.

Энэ үеэр эрэгтэйчүүдийн боловсрол, эрүүл мэнд, нийгмийн орчин нөхцлийн асуудлаар хэлэлцэх аж. Судалгаагаар Монголын хүн амын эрэгтэйчүүдийн 22 хувь, эмэгтэйчүүдийн таван хувь нь архинд донтох эмгэгтэй байна. Мөн бэлгийн замын халдварт өвчин, ДОХ зэргээр өвчлөгсдийн дийлэнх нь эрэгтэй хүн байгаа нь нөхөн үржихүйн мэдлэг мэдээлэл эрчүүдэд дутмаг байгаагийн илрэл гэж Монголын эрэгтэйчүүдийн холбоо үзэж байна. Тиймээс хөвгүүдийг багаас нь боловсрол, эрүүл мэнддээ хэрхэн анхаарах талаар нэгдсэн бодлоготой болох саналыг дээрх хурлыг зохион байгуулагчдын зүгээс тавьж байна.

Энэ мэт эрэгтэйчүүд, хөвгүүдэд тулгамддаг асуудлуудын талаар маргааш хэлэлцэнэ.

Ч.Туяа