Онцгой байдлын ерөнхий газрын хоёр алба хаагчид амины орон сууц гардуулан өгчээ.

Тодруулбал, ОБЕГ-ын харьяа Уул уурхайн 09 дүгээр ангиас амьсгалын бие даасан төхөөрөмжийн мэргэжилтэн, дэслэгч Г.Галсан, Эрэн хайх, аврах салбарын аврагч, жолооч холбоочин, ахлах ахлагч О.Батзаяа нарт хамт олных нь сэтгэлийн дэмээр сүндэрлэсэн амины орон сууцны түлхүүрийг намрын дунд сарын шинийн 17-ны өдрийг тохиолдуулан гардуулан өглөө.

ОБЕГ-ын дарга, хошууч генерал Г.Ариунбуян “Онцгой байдлын байгууллагын алба хаагчдыг орон сууцжуулах хөтөлбөр"-ийн  хүрээнд алба хаагчдынхаа нийгмийн баталгааг хангах, тэдний гэр бүлийн нийгмийн асуудлыг дэмжих, орон сууцжуулах, амьдрах орчин нөхцөлийг сайжруулах, ая тухтай, тогтвор суурьшилтай амьдрах нөхцөлийг бүрдүүлэх зорилтыг хэрэгжүүлж байна. Энэхүү зорилтыг хэрэгжүүлэхэд санаачилгатай, манлайлан оролцож байгаад талархал илэрхийлж, ажлын амжилт хүсье” гэлээ.

Тус хамт олны санаачилсан арга хэмжээг нийгмийн хариуцлагын хүрээнд 26 аж ахуй нэгж, байгууллага дэмжин, хамтран ажилласан байна.

Эх сурвалж: Онцгой байдлын ерөнхий газар