75 жилийн түүхтэй УБТЗ-ын Төв эмнэлэг нь өнөөг хүртэл төмөр замчид болон тэдний гэр бүлд эрүүл мэндийн тусламж, үйлчилгээ үзүүлж ирсэн. Харин энэ оны есдүгээр сараас эхлэн тус эмнэлэг иргэдэд эрүүл мэндийн даатгалаар, харьяалал харгалзахгүйгээр урологи, ходоод, бүдүүн, шулуун гэдэсний дурангийн үзлэг, оношилгоо, эмчилгээний үйлчилгээг үзүүлж эхэллээ.

Тус эмнэлэг нь орчин үеийн дэвшилтэт технологид суурилсан оношилгооны үйлчилгээг нэвтрүүлж, өвчнийг эрт илрүүлэх, хүндрэлээс сэргийлэхэд чиглэсэн тусламж, үйлчилгээг өргөжүүлж байна. Үүний нэг нь ходоод, бүдүүн, шулуун гэдэсний дурангийн оношилгоо юм.

Бүдүүн, шулуун гэдэсний эмгэг, тэр дундаа хавдрыг эрт илрүүлэхэд дурангийн шинжилгээ чухал ач холбогдолтой. Ялангуяа 45 наснаас дээш иргэдийг гурван жилд нэг удаа, 60 наснаас дээш бол жил бүр урьдчилан сэргийлэх үзлэгт хамруулах шаардлагатай байдаг. Гэвч иргэдийн дунд товлосон хугацаанд үзлэг, шинжилгээнд хамрагдах байдал хангалтгүй хэвээр байна.

Дурангийн шинжилгээгээр өвчнийг шинж тэмдэг илрэхээс өмнө илрүүлэхээс гадна бүдүүн гэдэсний ургацаг, салстын өөрчлөлт зэрэг хавдрын эрсдэлт эмгэгийг эрт оношлох боломжтой. Илэрсэн ургацгийг тухай бүрт нь эмчлэх нь цаашид хавдар үүсэх эрсдэлийг бууруулах ач холбогдолтой.

Мөн эрэгтэйчүүдийн эрүүл мэндийн тусламж, үйлчилгээг өргөжүүлэх хүрээнд УБТЗ-ын Төв эмнэлгийн Урологийн мэс заслын тасагт түрүү булчирхайн дурангийн мэс засал, хоргүй хавдрыг дурангаар авах, шээсний сүв болон давсагны дурангийн оношилгоо, давсагны чулууг дурангаар авах зэрэг эмчилгээний шинэ технологийг нэвтрүүлэн ажиллаж байна.

Ингэснээр иргэд заавал өөрийн харьяаллын эмнэлэгт хандахгүйгээр эрүүл мэндийн даатгалаар төрөлжсөн тусламж, үйлчилгээ авах боломж нэмэгдэж байгаа юм.

УБТЗ-ын Төв эмнэлэг нь 21 аймаг, 9 дүүргийн иргэдэд ажлын өдрүүдэд хуваарийн дагуу харьяалал харгалзахгүйгээр дурангийн үзлэг, оношилгоо, холбогдох үйлчилгээг үзүүлж байна.

Эмч, мэргэжилтнүүдийн зүгээс иргэдийг өвдсөн хойноо бус, эрүүл үедээ урьдчилан сэргийлэх үзлэгт тогтмол хамрагдаж, эрүүл мэнддээ анхаарахыг зөвлөж байна.

Дурангийн оношилгоо нь өвчнийг эрт илрүүлж, хавдраас сэргийлэх чухал боломж юм.

Иргэд та бүхэн УБТЗ-ын Төв эмнэлэгт цахимаар цаг авч, урьдчилан сэргийлэх үзлэг, оношилгоондоо хамрагдаарай.