Хүнсний зах, дэлгүүрүүдэд махны үнэ өссөн хэвээр байна. Жил бүр хаврын улиралд махны нийлүүлэлт багасаж, үнийн өсөлтөөс сэргийлэх зорилгоор нөөцийн мах худалдаалдаг ч энэ жилийн хувьд үнэ өмнөх жилүүдээс өндөр байгаа талаар иргэд хэлж байв.

ҮСХ-ноос гаргасан гол нэрийн барааны үнийн судалгаанаас харвал, 2025 оны тавдугаар сарын 5-ны байдлаар хонины ястай мах кг нь, 17,477 төгрөг, үхрийн цул мах кг нь 23,325 төгрөгөөр худалдаалагдаж байв.

Тэгвэл 2026 оны мөн үеийн байдлаар хонины мах 50.7, үхрийн мах 51.9 хувиар тус тус өссөн байна.

2026 оны тавдугаар сарын 8-ны өдрийн байдлаар нэг килограмм махны үнэ хэд байгаа талаар сурвалжлахаар "Хүчит шонхор" зах болон "Бөмбөгөр" худалдааны төвийг зорьсон юм.

Иргэн Х.Ууганбаяр “Өнгөрсөн жил манайх долоо хоногт хоёр удаа үхрийн мах худалдан авдаг байсан.  Харин энэ хавраас хойш махны үнэ огцом өсөөд, зах дээр нэг килограмм мах авахад өмнөхөөсөө бараг хоёр дахин их мөнгө зарцуулж байна.

Сая "Хүчит Шонхор" захаас 2 кг мах 72 мянган төгрөгөөр авлаа. Гэтэл манайх ам бүл тавуулаа болохоор тэр мах нь хэдхэн хоолонд л хүрч байна. Өмнө нь ийм мөнгөөр илүү мах аваад хэд хоног хэрэглэдэг байсан санагддаг.

Цалин нэмэгдээгүй болохоор гэр бүлийнхээ хоолны зардлыг багасгах хэрэгтэй болж, одоо махтай хоолны оронд илүү гурил, төмс, өндөг хэрэглэдэг болсон. Махны үнэ жил бүр нэмэгддэг учраас жирийн өрхүүдэд их дарамт болж байна" гэв.