Ус, цаг агаар, орчны мэдээллийн газраас ирэх өвөл, хаврын бэлчээрийн даацыг тодорхойллоо. Тодорхойлолтоор бэлчээрийн даац нийт нутгийн 50 гаруй хувьд хүрэлцээтэй, харин 40 гаруй хувьд хэтэрсэн дүгнэлт гарсан байна. Үүнд:

• 32.3%  бэлчээрийн нөөцтэй
• 20.5% бэлчээр хүрэлцээтэй
• 29.8% даац 1-3 дахин хэтэрсэн
• 8.3% даац 3-5 дахин хэтэрсэн
• 9.1% даац олон дахин хэтэрсэн гэсэн тооцоо гарчээ. 

Наймдугаар сарын 20-ны байдлаар зуншлага нийт нутгийн 60 орчим хувьд хэвийн, нутгийн 40 гаруй хувьд гантай болон гандуу байна. 

Аймгийн дүнгээр авч үзвэл Баян-Өлгий, Ховд, Баянхонгор, Дундговь, Өмнөговь, Сүхбаатар аймгийн зарим, Увс, Говь-Алтай, Хөвсгөл, Архангай, Булган, Өвөрхангай, Дорноговь, Хэнтий аймгийн цөөн сумдын зарим нутгаар зуншлага оройтсон, гандуу болон гантай байгаагаас даац олон дахин хэтэрч гарчээ.

Бэлчээрийн даац хэтэрсэн нутгуудад бэлчээрийн нөөц, хүрэлцээ муу, мал хангалттай тарга тэвээрэг авч чадаагүй тул эдгээр бүс нутгууд өвс, хадланг бэлчээрийн нөөц бүхий нутгаас бэлтгэж, нэмэгдэл тэжээлийг нөөцлөх, отор нүүдлийн зохион байгуулалт хийх, малаа эдийн засгийн эргэлтэд оруулж, тоог бууруулах зэрэг арга хэмжээг эртнээс авч хэрэгжүүлэн өвөлжилт, хаваржилтад бэлтгэх шаардлагатай юм.

Эх сурвалж: УЦУОШГ