NBA-ийн од, домогт сагсан бөмбөгчин Коби Брайнт нисдэг тэрэгний ослоор хорвоог орхижээ.  Түүнтэй хамт нисэж явсан 13 настай охин Жианна болон долоон хүн мөн амиа алдсан байна.

Нисдэг тэрэг Лос-Анжелесаас холгүй Калабасас хотын ойролцоо осолдсон бөгөөд одоогоор ослын шалтгаан тодорхойгүй байна. Брайнт ихэвчлэн хувийн нисдэг тэргээр зорчдог байсан аж. Лос-Анжелесийн цагдаагийн газраас мэдээлснээр нисдэг тэрэгт нийт есөн хүн байсан ба нэг нь ч амьд гараагүй гэнэ.

41 настай алдарт сагсан бөмбөгч бүхий л амьдралынхаа турш Лейкерс багт тоглосон юм. Тэрбээр 2016 оны дөрөвдүгээр сард зодог тайлсан билээ.

Брайнт 20 улирлын турш нийт таван удаагийн аваргын цол хүртэж, АНУ-ын үндэсний шигшээ багт тоглохдоо хоёр удаа Олимпийн аварга болсон юм.  Түүнчлэн NBA-ийн  MVP /хамгийн үнэ цэнтэй тоглогч/шагналыг дөрвөн удаа хүртсэн цорын ганц тамирчин билээ. 

Брайант түүнчлэн “Dear Basketball” богино хэмжээний анимейшн бүтээлээрээ Оскарын шагнал хүртэж байсан. Тэрхүү анимейшнийг Брайнтын 2015 онд сагсан бөмбөгт зориулан бичсэн шүлэгт үндэслэн бүтээсэн юм. 

Коби Брайнт болон түүний гэргий Ванесса нар Жианна болон 17 настай Натали, 3 настай Бианка, 7 сартай Капри хэмээх дөрвөн охинтой. Хоёр сарын өмнө тэд гэрлэснийхээ 20 жилийн ойн баярыг тэмдэглэжээ. 

Дэлхий дахин түүний араас гашуудаж байна

Сагсан бөмбөгч Кевин Лав "Үгүй ээ, гуйж байна, үгүй. Байж болшгүй юм" хэмээн Твиттертээ бичсэн бол АНУ-ын Ерөнхийлөгч Дональд Трамп "Аймшигтай мэдээ" гэж бичив. Алдарт хөл бөмбөгч Лионель Месси "Хэлэх ч үг алга. Түүнтэй танилцсандаа, хамтдаа өнгөрүүлсэн цаг хугацаагаараа бахархаж байна. Чи ховор тохиолдох суут хүн байсан юм шүү" хэмээжээ.

Ерөнхийлөгч асан Барак Обама "талбайн домог" гэсэн бол найман удаагийн Олимпийн аварга Усэйн Болт итгэж чадахгүй байгаагаа илэрхийлэв. Рэппер Канье Уэст  "Коби бид чамд хайртай" хэмээн жиргэжээ.

Брайнтын шүтэн бишрэгчид Лос Анжелес дахь Стейплс Центр спорт цогцолборын өмнө ирж цэцэг тавьж эмгэнэл илэрхийлж байна.

Эх сурвалж: BBC