Хүмүүс сүнстэй янз бүрийн байдлаар учирдаг байна. Тухайлбал, хий юм үзэгдэх, сонин гэрэл харах, өрөөн дотор хэн нэгэн байгааг мэдрэх, дуу авиа сонсох, дулааны гэнэтийн өөрчлөлтийг мэдрэх гээд. Түүгээр ч барахгүй нас барсан хамаатных нь дуртай хоол гал тогоонд үнэртэж, хөгжим унтраасан үед тэдний дуртай дууг сонслоо гэх яриа ч байдаг.

Эд юмс тавиур дээрээс унаж, хаалга өөрөө хаагдаж нээгдэнэ. Бас нэг учрал нь авахуулсан зураг дээрээсээ янз бүрийн хэлбэр дүрс, хий хоосон зүйл байгааг ажигласан байдаг. Зарим судлаачдын үзэж буйгаар сүнс нүдэнд харагдаж, тодорхой байрлал, хүмүүс рүү ханддагийн учир нь ихэвчлэн хэн нэгэн, гэр бүлийнхэн, найз нөхөд, дотны хүмүүсээ үхлийн аюулаас сэрэмжлүүлсэн байдаг гэнэ. Үүнийг судлаачид бодит сүнс гэхээс илүү зайнаас бодол дамжуулах үзэгдэл гэж үздэг.

Хертфордшир их сургуулийн Ричард Вайсмэн Их Британи дахь сүнстэй гэгддэг газруудыг судалжээ. Хамптоны ордны сүнсний галерей, Эдинбургийн бунхан, Мари Кинг Клоус зэрэг газруудыг судлахдаа хүмүүс сүнстэй таарсан гэх газрыг яг тодорхой хэлж чадах тэндхийн ажилтнуудтай уулзаж, яриаг нь бичиж авчээ. Тэгээд зочдын ямар нэг хэвийн бус зүйлтэй таарсан гэх мэдээллүүдийг баримтжуулахыг хүссэн байна. Үүний үр дүнд хамгийн их сүнстэй гэж яригддаг газруудад хүмүүст илүү их сонин, хачин зүйл тохиолдсон байж. Хий үзэгдэлтэй гэх зарим газар судлаачид тухайн орчны соронзон талбайг хэмжиж үзэхэд ердийнхөөс илүү хүчтэй эсвэл ер бусын хэлбэлзэл үзүүлж байсан байна. Зарим тайлагдашгүй үзэгдлийг мөрдөгчид үүнийг сүнсний үзүүлж байгаа соронзон гэж үздэг. Тэгвэл үгүйсгэгчид эдгээр соронзон орон хүний тархинд нөлөөлж, хий юм харах сонсох, толгой эргэх зэрэг мэдрэлийн өвчний шинж тэмдгүүд илэрдэг гэжээ. Мөн зарим судлаачид үүнийг хүмүүс шөнийн цагаар хий үзэгдэл идэвхждэг гэж үздэгтэй холбож онолдсон байдаг.

Учир нь нарны агаар, газрын соронзон давхраатай харилцан үйлдэлд орсноор ертөнцийн соронзон орон харанхуйд тэлдэг байна. Зарим судлаачид тэр тэлсэн соронзон орон хүний тархинд хүчтэй нөлөөлж магад гэж таамаг дэвшүүлдэг. Анагаах ухааны эрдэмтэд хүний тархинд үзүүлэх соронзон орны нөлөөллийг судалж үзжээ. Цахилгаан соронзонгийн өдөөлт хүний тархины янз бүрийн хэсэгт нөлөөлөхдөө хүмүүсийг хий юм харах, сонсох болон үхэлтэй тулгарсан шиг мэдрэмжийг төрүүлж байсан байна.

Мөн хий үзэгдэл, сүнстэй гэж бодогддог барилгууд ихэнх нь хүйтэн газар байдаг байна. Хэт авиа гэж нэрлэгддэг бага давтамжтай дууны долгион бас хүнийг сүнсний талаар бодоход хүргэдэг гэжээ. Сүнс үнэхээр байдаг эсэхийг үл харгалзан олон хүний анхаарлыг эрхгүй татдаг.