Хүний эрх, эрх чөлөө, жендерийн тэгш байдлыг эрхэмлэх соёлыг залууст түгээн дэлгэрүүлэх зорилготой эрх чөлөөний парад ирэх сарын 12-ны өдөр эхлэх гэж байна. Парад эрх чөлөөний талбайгаас гараагаа эхлэж сонирхолтой хэлбэрээр өрнөнө. Үүнд парадад оролцохыг хүссэн залуус, уран бүтээлчид хүний эрх, эрх чөлөө, тэгш байдлыг сонирхолтой бүтээлч, хөгжилтэй хэлбэрээр олон нийтэд сурталчилж өөрсдийн үзэл бодлоо чөлөөтэй илэрхийлэх аж. Өөрсдийн үзэл бодлоор нэгдэн ирсэн бүх хүнд мөн энэ эрх нээлттэй. Уг парад хоёр дахь жилдээ зохиогдож байгаа. Энэ жил "Эмэгтэйчүүдийг ялгаварлан гадуурхах бүх хэлбэрийг устгах тухай конвенц"-ийн 30 жилийн ойн хүрээнд явагдах юм. Эрх чөлөөний парад сонирхолтой, өвөрмөц, шинэлэг, хөгжилтэй хэлбэрээр явагдаж хүн бүр өөрийн дахин давтагдашгүй байдлыг илтгэх аж. Жишээлбэл, өөрийн дуртай үлгэрийн баатар, хайртай дүрээрээ хувцаслаж нүүрээ хувиргаж өөрийн давтагдашгүй өнгө төрхийг бий болгох боломжтой. Ийм ч учраас энэ жилийн парадаар хамгийн өвөрмөц, шинэлэг донж маягаар өөрийгөө илэрхийлсэн хүнийг шалгаруулж шагнал гардуулах аж.

Өнгөрсөн жил уг парад "Эрхийнхээ төлөө гараа өргөцгөөе" нэртэйгээр аравдугаар сарын 4-ний өдөр зохиогдож байжээ. Угарга хэмжээ нь олны анхаарлыг хүний эрхийн асуудалд хандуулж, эрх чөлөөний тухай зөв зохистой ойлголтыг залууст төрүүлэх зорилготой аж. Парад залуусын чөлөөт сэтгэлгээнд тулгуурлаж сонирхолтой, өвөрмөц байдлаар зохиогддогоороо онцлогтой.

Уг парад цаашид жил бүр зохиогдох аж. Ингэснээрээ улс орон даяараа эрхийнхээ төлөө гараа өргөж дуу хоолойгоо нэгтгэсэн том баяр болохыг зорьж байна.

О.Урантогос