Худалдаачны гэрээс Улаанбаатар хотын музейн барилга болсон түүх

“Найрсаг Улаанбаатар” хөтөлбөрийн хүрээнд Улаанбаатар хотын музейгээс хотын иргэдийн түүх, соёлын дурсгалын талаарх мэдлэгийг тэлэх зорилгоор Улаанбаатар хотод зорьж үзэх ёстой 20 дурсгалыг танилцуулж байна.

Ингэхдээ хөшөө дурсгал, сүм хийд, дурсгалт барилга, дурсгалт газар гэсэн дөрвөн чиглэлээр танилцуулах юм байна.

 Таван дурсгалт барилгад
1.    Чин ван Ханддоржийн барилга
2.    Г.Занабазарын нэрэмжит Дүрслэх урлагийн музейн барилга
3.    Улаанбаатар хотын музейн барилга
4.    Улсын дуурь, бүжгийн эрдмийн театрын барилга
5.    Улсын драмын эрдмийн театрын барилга тус тус оржээ.

Энэ удаа Улаанбаатар хотод зорьж үзэх дараах таван дурсгалт барилгуудаас Улаанбаатар хотын музейн барилгын түүхийг сонирхуулж байна.

Улаанбаатар хотын музейн байшин

Оросын буриад худалдаачин Цогт Гармаевич Бадамжав (Цогтбадамжав) 1918-1919 онд өөрийн сууцанд зориулан бариулж, 1932 он хүртэл эхнэр хүүхдийн хамт амьдарч байв.

Энэ байшинд 1921 оны 7 дугаар сарын 8-10-нд Монгол Улсын Намын төв хороо, Ардын түр засгийн газар, хашаанд нь Бүх цэргийн штаб байрлаж байв.

Тус байшинд 1930-аад оны үед Зөвлөлт-Тува улсын элчин сайдын яам, 1946-1953 онд Д.Сүхбаатарын музей, 1953-1956 онд Хэвлэлийн төв газар, 1956 оноос өнөөг хүртэл Улаанбаатар хотын музей байрлаж байна.

Энэ байшин нь тухайн үед өвөрмөц хийцтэй, тохилог сууцын нэгд тооцогддог байсан бөгөөд Цогтбадамжав байшингийнхаа орой дээр Оросын хаан ширээ унасныг бэлгэдэн ширээ хөмрүүлэн, хөлийг дээш харуулан байрлуулсан нь өдгөө ч хэвээр хадгалагдан үлджээ.

Байршил:
Баянзүрх дүүргийн 15 дугаар хороо, Энхтайвны өргөн чөлөөний урд талд, Сангийн хорооны гудамжны зүүн талд, Бөхийн өргөөний зүүн хойд талд байрладаг.

Хамгаалалтын зэрэглэл:
БНМАУ-ын СнЗ-ын 1961 оны 524 дүгээр тогтоол улсын хоёрдугаар зэргийн (нийслэлийн) хамгаалалтад, Монгол улсын Засгийн газрын 2008 оны 175 дугаар тогтоолоор улсын хамгаалалтад авсан.

Солбилцол:
N47 55 6.1
E106 56 9.7

Онцлог:
Дорнод Сибирийн уламжлалт загвартай барилга.