Баянгол зочид буудлын оффисын өрөө байрлах хэсэгт яг одоо цагдаа, хүчнийхэн олноор очиж хамгаалалтад аваад байна.

Эх сурвалжийн хэлж байгаагаар 30 орчим цагдаа, хүчний байгууллагын ажилчид буудалд нэвтэрч нэгжлэг хийж байгаа гэлээ.

УИХ-ын гишүүн Х.Баттулга, түүний өмгөөлөгч Д.Пүрэвбаатар нар оффисын өрөөндөө байгаа юм байна. 

Цагдаа нар зочид буудлын оффисын өрөө байрлах хэсгийг дотроос нь түгжиж нэг ч хүн дотогш нэвтрүүлэхгүй байна.

Асашёорюү Д.Дагвадорж нарын олон хүн Баянгол зочид буудлын гадаа ирээд байна. 

УИХ-ын дарга З.Энхболдын Барилга хот байгуулалт хариуцсан зөвлөх Г.Байгалмаа болон УИХ-ын гишүүн, Зам тээврийн сайд М.Зоригт нар Баянгол зочид буудалд ирж, хойд талын хаалгаар дотогш нэвтэрлээ.

Засгийн газрын хуралдаанд сууж байсан М.Зоригт гишүүн хэвлэл мэдээллийн хэрэгслүүдээр гарсан мэдээллийг хараад хуралдааныг орхин шууд иржээ.

Г.Байгалмаа нь Монголын Ардчилсан холбооны удирдах зөвлөлийн гишүүнээр ажилладаг. Харин УИХ-ын гишүүн Х.Баттулга энэ холбооны ерөнхийлөгчөөр ажилладаг юм. 

Дөнгөж сая хотын дарга Э.Бат-Үүл, олимпийн алтан медальт Н.Түвшинбаяр нар Баянгол зочид буудал дээр ирлээ.

Хотын дарга Э.Бат-Үүл "Эрүүгийн хуулинд зааснаар хоёр гэрчийг байлцуулж байж байцаалт авах ёстой" гэж хэлээд мөн л хойд талын хаалгаар дотогш явж оров.

УИХ-ын гишүүн Г.Уянга дөнгөж сая Баянгол зочид буудалд ирлээ

Жүдогийн шигшээ багийн ахлах дасгалжуулагч О.Балжинням болон шигшээгийн дасгалжуулагч, насанд хүрэгчид залуучуудын шигшээ багийн 50 орчим тамирчид дотор байна.

Баттай эх сурвалжийн хэлснээр Сайншандын цогцолбортой холбоотой асуудлаар Баянгол зочид буудалд байрлах Баялгийн хувь ХК, Түмэнхишигтэн ХХК-д прокурорын зөвшөөрөлтэйгээр шалгалт хийж байгаа аж.

Цагдаагийн ерөнхий газраас өнөөдөр 18:10 цагаас энэхүү асуудлаар хэвлэлийн бага хурал зарлажээ.

Дотогшоо олимпийн аварга Н.Түвшинбаяр, Х.Цагаанбаатар, Херо интертайментийн н.Баатар нар дотогш орсон боловч цагдаагийнхан уулзуулаагүй байна. 

Х.Баттулга гишүүнийг өрөөнд нь байлцуулан нэгжлэг хийж байгаа юм.

Жүдо бөхийн шигшээ багийн ахлах дасгалжуулагч О.Балжинням "Маргааш Монголын жүдочид Олимпийн эрх олгох Азийн наадамд оролцохоор мордоно. Яг ийм эгзэгтэй мөчид холбооны Ерөнхийлөгчтэй холбоотой ийм асуудал гарч ирж байгаад эмзэглэж байна. Тамирчдын хувьд сэтгэл санааны байдал тогтвортой байх шаардлагатай. Тиймээс энэ явдал тэдний сэтгэлзүйд сөрөг нөлөө үзүүлнэ гэж эмээж байна. УИХ-ын гишүүн Х.Баттулга Монголын тамирчид өндөр амжилт гаргахад үнэтэй хувь нэмэр оруулсан хүн. Хууль бус зүйл хийсэн гэдэгт итгэхгүй" гэж хэллээ.

Жүдогийн шигшээ багийнхан хоёр тийшээ хуваагдсан байна. Тэдний нэг нь баруун, нөгөөдөх нь хойшоо харсан хаалга руу хуваагджээ. Хэрвээ А.Баттулга гишүүнийг хүчээр авч гарвал жүдочид гишүүнийг хамгаалалтад авах юм байна.

Олимпийн эрх олгох тэмцээнд бүтэн багаараа явах гэж байгаа энэ үед жингээ хассан тамирчид хүртэл зогсч байна.

Цагдаагийн тусгай албаны нэмэлт хүч ирлээ.

УИХ-ын гишүүн З.Батзандан Баянгол зочид буудлын хойд хаалгаар дотогшоо орлоо. SWAT гэсэн бичигтэй хар өнгийн машин Баянгол зочид буудлын хойд хаалган руу ойртон ирэхэд Х.Баттулга гишүүнийг баривчилуулахгүй гэсэн иргэд гарах хаалгыг хааж, гар барилцан зогслоо.

Тэд Баянхонгор аймгаас сонгогдсон УИХ-ын гишүүн Х.Баттулгыг баривчлахыг эсэргүүцэж байна. Монголд Улс хууль ёсгүй гэдгийг энэ явдал харууллаа хэмээн тэд хэлж байгаа юм.

Ардчилсан намын Ерөнхий нарийн бичгийн дарга  Л.Эрхэмбаяр Баянгол зочид буудлаас гарлаа. Тэрээр УИХ гишүүн Х.Баттулгатай уулзаж чалдсангүй. Харин дотогш орсон бусад УИХ гишүүд гарч ирээгүй байна. 

Тэнд цугласан иргэдийн дотроос Баянхонгороос ирсэн нэгэн иргэн энэ үйл явдлын цаана УИХ гишүүн С.Баярцогт байна.  С.Баярцогт гишүүн гурван найзын хамт гадаад дахь оффсор дансаа нээснээ хэлсэн. Тэдгээр найзуудыг нь хэн болохыг хэлээгүй. Энэ бол дээрээсээ зохион байгуулсан ажил. Тэдгээр гурван найз нь төрийн өндөр албан тушаалтан гэдэгт би итгэж байна гэв.

Баянгол зочид буудлын Захиалгын менежер Н.Одонтунгалаг сэтгүүлчдэд мэдээлэл өглөө. Тэрээр "Яг одоогийн байдлаар Баянгол зочид буудалд 52 орны жуулчид байрлаж байна. Хууль хяналтын байгууллагынхан маш бүдүүлэг үйлдэл гаргаж, манай буудлын эрх ашгийг ноцтойгоор зөрчиж байна" гэв.

Түүнчлэн чөлөөт бөхийн ААШТ-нд оролцох 22 орны 74 тамирчин өнөө орой Баянгол зочид буудалд буудаллах ёстой юм байна.

Буудлын ажилтнууд зочдынхоо аюулгүй байдалд ихээхэн санаа зовниж байна. Цагдаагийнхан буудал руу орох болон буудлаас гарахыг хориглосон гэж Н.Одонтунгалаг хэллээ.

Цагдаагийнхан жуулчдын аюулгүй байдалд ямар нэгэн байдлаар заналхийлсэн үү, хэрэв цагдаагийнхан зочид буудал руу хэнийг ч оруулж, гаргахгүй байгаа бол та яаж гарч ирсэн бэ гэсэн асуултад Баянгол зочид буудлын Захиалгын менежер хариулт өгсөнгүй.

Баруун талын хаалга  руу тусгайгийн 10 ажилтан ирж дотогш нэвтрэх гэсэн боловч Баянгол зочид буудлын урд цугласан иргэд хаалгыг хаан зогсож тэднийг дотогш нэвтрүүлсэнгүй.

Иргэд тусгайгийнхан руу хандаж "Та нар С.Баярцогтыг баривчил. С.Баярцогтын оффшор дансыг шалга" гэж хэлсэн байна.

Тусгайгийнхан Баянгол зочид буудал дотор байгаа хүмүүсийг гарган авахаар ирсэн гэдгээс өөр мэдээлэл өгсөнгүй.

Баянгол зочид буудлын эргэн тойронд олон хүмүүс цуглараад байна. Тэдний дунд Босоо Хөх Монгол хөдөлгөөний залуучууд ч байгаа юм.

Цагдаагийнхан нэгжлэг хийж дуусаад, компьютер болон шаардлагатай бичиг баримтуудыг хураан авч хайрцагласан байна. Тэд гарах гэсэн боловч Баянгол зочид буудлын хаалгыг хааж зогсож буй иргэд цагдаагийнханыг гаргахгүй байна хэмээн ЦЕГ-аас мэдээллээ. 

Тусгайгийнхан Баянгол зочид буудлын баруун тийшээ харсан хаалганаас зургаан хайрцаг бичиг баримт авч гарч ирлээ. Эдгээр бичиг баримтыг машин руу ачив. УИХ-ын гишүүн М.Зоригт тэдэнтэй цуг гарч ирсэн байна.

УИХ-ын гишүүн Х.Баттулга Баянгол зочид буудлаас гарч ирж, хэвлэлийнхэнд мэдээлэл өгсөн юм. Тэрээр "Өнөөдөр өглөө Баялгийн хувь компанийн захирлыг баривчилсан талаар надад хэлсэн. Төмөр замын гэх хэрэг нь явсаар хувийн компани руу халдаж байгаад харамсаж байна. Захиалагч нар нь удахгүй тодорхой болно" гэсэн юм.

УИХ-ын гишүүн Ж.Батзандан, Д.Гарамгайбаатар нар гарч ирж иргэдтэй ярилцлаа.

Д.Гарамгайбаатар "Баривчлах эсэхийг нь сайн мэдэхгүй байна. Өнөө өглөө Төрийн ордонд болсон бүлгийн хуралдаанаар энэ асуудлыг бид ярилцсан. Х.Баттулга гишүүнийг шалгана гэдгийг бид мэдэж байсан. Иймээс байдал ямар байгаатай танилцахаар ирсэн" гэлээ. 

Түүнчлэн Х.Баттулга гишүүнийг ганцааранг нь байцаасан гэх мэдээллийг няцааж, УИХ-ын гишүүд түүнтэй хамт байсан гэлээ.

Ардчилсан намын ахмад гишүүн Дарь.Сүхбаатар Баянгол зочид буудлын ойролцоо цугласан сэтгүүлч болон олон нийтэд хандан тарахыг уриаллаа.

Түүнчлэн Х.Баттулга гишүүний өмгөөлөгч Д.Пүрэвбаатар “Өнөөдөр болсон хэргийн талаар тусад нь хэвлэлийн хурал зарлана” гэж хэллээ.

Мөн "Баянгол зочид буудал дотор хууль хүчний байгууллагын нэг ч хүн үлдээгүй. Бүгд явцгаасан. Тэд зохих зөвшөөрлийн бичиг баримтаа үзүүлэн, процедурын дагуу ажилласан. Хууль зөрчсөн үйлдэл гаргаагүй" гэв

Х.Баттулга гишүүн хэвлэлийн бага хурал тусдаа зарлаж хийлгэх учраас хэвлэл мэдээллийнхнийг тарахыг хүслээ.