МУИС-ын багш, доктор профессор Б.Эрдэнэбаттай ярилцлаа

-Эдийн засгийн өнөөгийн нөхцөл байдалд ханш цаашид ямар хүлээлттэй байна вэ?

-Тодорхой бус байдал их байна. ЗГ-ын үйлдэл, оролцоо ямар байна гэдгээс хамаараад ханшийн хүлээлтүүд өөр өөр байна.  Хөрөнгө оруулалтын төслүүд хугацаандаа яваад, Оюу-Толгойн 2 дахь шатны санхүүжилт 9 дүгээр сараас эхэлнэ гэвэл төгрөгийн ханш буцаад чангарна.  Хэрэв эдгээр хөрөнгө оруулалтууд тодорхой бус хэвээр үргэлжилвэл төгрөгийн ханш суларна.

-Ханшид улирлын нөлөөлөл хэрхэн нөлөөлдөг вэ?  Оргил сарууд болох 3-5 саруудад ам.доллар ихээр гадагшладаг.  Харин ирэх сараас экспортын орлого орж ирдэг үе.  Тэгэхээр ханш цаашид тогтворжих уу?

-Харьцангуй том хэмжээний хөрөнгө оруулалтаас ханшийн нөлөөлөл бий болж байгаа.  Харин улирлын нөлөөлөл ханшин дээр байхгүй.  Хэрэв тийм байсан бол хүмүүс буурдаг үед нь худалдаж аваад өссөн үед нь зараад байна шүү дээ.  Тэгэхээр долларын орох гарах урсгал улирлаас хамааралгүй явагдаж байгаа.  Томоохон хэмжээний валютын урсгал манай улсад орж ирвэл ханшид нөлөөлөх нь мэдээж.

-Төв банк бодлогын хүүгээ огцом өсгөвөл ханш 1600 эсвэл 1500 төгрөгт ч хүрэх магадлалтай, үүний эерэг болон сөрөг тал нь юу вэ?

-Хэрэв бодлогын хүүг өсгөвөл зээлийн хүү өснө.  Зээлийн хүү өсгөх нь эргээд ард иргэдэд хүнд ачаа болж шудрагаар бизнес эрхлэгчдийг боомилно гэсэн үг.  Тиймээс Төв банкны зүгээс явуулж байгаа уламжлалт бус бодлого, арга хэмжээнүүддээ ихээхэн анхаарч нөөцөө зөв удирдах нь чухал юм.

Ярилцсан Х.Түвшинбаяр