СХД-ийн нутаг дэвсгэр Зүүн салааны гудамжинд согтууруулах ундаа хэрэглэсэн эмэгтэй жолооч айлын хашаа мөргөж, монгол гэрт байсан 2, 3 насны хоёр хүүхдийг ээжийнх нь хамт дайрч, гэмтээсэн ноцтой осол өнөөдөр гарчээ. 20 гаруй насны ээж болон хүүхдүүдийг ГССҮТ-д хүргэсэн байна.

Хоёр настай охин ухаан орохгүй байна. Гурван настай хүүгийн хөл хугарсан. Мэдээ алдуулах тариа хийж, мэс засалд оруулна гэж мэдээлж байна.

Жолооч эмэгтэй өөрөө дөрвөн хүүхдээ машиндаа тээвэрлэж явсан. Жолооч 1.64 хувийн согтолттой байсан хэмээн тээврийн цагдаагийн албанаас мэдээллээ. 

Мөн өнөөдөр цагдаа нар машиндаа 2-12 насны зургаан хүүхэд суулгасан согтууруулах ундаа хэрэглэсэн эрэгтэй жолоочийг саатуулан шалгаж байна. 



ТЦА-ны Урьдчилан сэргийлэх хэлтсийн ахлах мэргэжилтэн, Цагдаагийн хошууч Шинэбаяр, 2020 оны эхний долоон сарын байдлаар согтуугаар тээврийн хэрэгсэл жолоодсон 13 мянган зөрчлийг илрүүлсэн.  Мөн согтуугаар тээврийн хэрэгсэл жолоодож, зам тээврийн осол гаргасан 561 зөрчил бүртгэгдсэн ба ослын улмаас 50 хүний амь нас хохирч, 83 хүн гэмтсэн байна. 

Зам тээврийн ослын улмаас энэ оны эхний долоон сард 38 хүүхдийн амь нас хохирч, 130 гаруй хүүхэд гэмтсэн харамсалтай тоон мэдээ байна. Зам тээврийн осол гэмтлийн гол шалтгаан нь согтуугаар тээврийн хэрэгсэл жолоодох, бага насны хүүхдийг зориулалтын суудалд суулгаж тээвэрлээгүй, хамгаалалтын бүс зүүгээгүйгээс болж байна.