Өнөөдөр буюу тавдугаар сарын 21-ний өдрийг тэнэгэр уудам нутагт тархан нүүдэлсэн олон овог аймаг бүхий Монгол түмнийг нэгэн багц мэт нэгтгэн, Их Монгол улсыг байгуулсан Их эзэн Чингис хааны /1162-1227/ мэндэлсэн өдөр хэмээн тэмдэглэн өнгөрүүлэхээр болсон билээ. Чингис хааны төрсөн өдөрт зориулсан ёслолын арга хэмжээ жанжин Д.Сүхбаатарын талбайд болж өнгөрлөө.

Өнөөдрийн үйл ажиллагаанд хүндэт харуул жагсан төрийн дуулал эгшиглэж Монгол Улсын Ерөнхийлөгч Н.Энхбаяр, УИХ-ын дарга Д.Лүндээжанцан, Ерөнхий сайд С.Баяр нар болон УИХ, Засгийн газрын гишүүд, гадаадын Элчин сайд, зочид төлөөлөгчид Чингис хааны хөшөөнд хүндэтгэл илэрхийллээ.

“Бурхан багшийн их дүйчэн, Очирваань шүтээний равнай ёслол, Их эзэн Чингис хааны хүндэтгэл ёсон нийлэн нэгдэж энэрэхүй ёс, эв нэгдэл, эрч хүчний бэлгэдэл утгад шүтэн барилдаж байна” хэмээн Монгол улсын Ерөнхийлөгч Н.Энхбаяр хэлж байсан билээ.

Монгол түмний нэрийг дэлхий нийтэд цуурайтуулсан Чингис хааны байгуулсан гавьяа нь Монголчуудад төдийгүй хүн төрөлхтний түүхэнд гүнзгий ул мөрөө үлдээсэн билээ. Чингис хааны биечлэн хэрэгжүүлсэн олон зүйл нь урьд хожид дэлхийн түүхэнд байгаагүй цоо шинэ зүйл болсон юм. Түүний цэрэг дайны гайхалтай тактик, удирдах системийн төгөлдөржилт, өртөө улаа, хууль цааз гээд олон олон зүйлсийг дурьдаж болох билээ. Тэр бүхнийг хожим дэлхийн олон улс оронд тухайн орны өвөрмөц онцлогт тохирч өөр өөр хувилбараар хэрэгжүүлсэн нь Чингис хааны түүхэнд гүйцэтгэсэн үүргийг улам ихээр тодруулсан хэрэг болсон юм. Чингис хааны хүн төрөлхтөнд үлдээсэн олон эерэг түүхэн үйлс нь ертөнцийн суу ихт үлгэр дууриалал үргэлж болж байдаг нь бахархууштай. Монгол хүн бүхний зүрхэнд бахархлын сэтгэлийг үргэлжид төрүүлж Их эзэн Чингис хааны төрсөн өдөр энэхүү билэгт сайн өдөр тохиож байна.

М.Жаргал