Цахим орчинд WHIEDA брэндийн улавч, нүдний шилээр өвчин эдгээнэ гэх агуулгатай, хэрэглэгчдийг төөрөгдүүлсэн байж болзошгүй зар сурталчилгаа түгээсэн үйлдэлд Монополын эсрэг газраас зөрчлийн хэрэг нээж, хэрэг бүртгэлтийн ажиллагаа явуулан арга хэмжээ авчээ.

Тодруулбал, “Whieda Mongolia” гэх цахим хуудаснаас тус брэндийн улавч, нүдний шилийг сурталчлахдаа Зар сурталчилгааны тухай хуулийн 7 дугаар зүйлийн 7.2.3-т заасан “хангалттай тодорхой мэдээллийг орхигдуулан, эсхүл мэдлэг, туршлага дутмаг буюу итгэмтгий байдлыг нь ашиглан хэрэглэгчийг төөрөгдөлд оруулсан” гэх заалтыг зөрчсөн нь тогтоогдсон байна.

Мөн зөрчлийг арилгах хугацаат үүрэг өгч, дахин гаргуулахгүй байх арга хэмжээ авч байгаа бөгөөд хуурамч, төөрөгдүүлсэн зар сурталчилгааг цахим болон биет хэлбэрээр түгээсэн тохиолдолд устгуулах, давтан зөрчил гаргавал хуульд заасан хариуцлага хүлээлгэхийг анхааруулсан байна.

“Өвчин эдгээнэ” гэх сурталчилгааг өмнө нь баримтаар шалгаж байжээ

Монголын баримт шалгах төвөөс (MFCC) WHIEDA-ийн бүтээгдэхүүний талаарх мэдээллийг өмнө нь баримтаар шалгаж байжээ. Тус төвийн шалгалтаар хөлийн нум дэмжих зориулалттай энгийн улавчийг “бүх төрлийн өвчнийг эдгээж, биеэс хор гадагшлуулна” гэх мэтээр сурталчилсан нь нотолгоонд нийцэхгүй болохыг мэдээлсэн байна.

Улавч нь хөлийн байрлал, биеийн галбирт тодорхой хэмжээгээр нөлөөлж, зарим тохиолдолд өвдөлтийг намдаахад тусалж болох ч бүх төрлийн өвчнийг эмчлэх зориулалттай эмчилгээний хэрэгсэл болохыг нотолсон баримт байхгүй гэж MFCC тайлбарлажээ. 

Мөн тус төвөөс WHIEDA-ийн “сөрөг ионтой” нүдний шил болон анионтой ариун цэврийн хэрэглэл өвчин эмгэгийг эмчилнэ гэх сурталчилгааг шалгасан байна. Шалгалтаар сөрөг ионтой нүдний шил нүдний өвчнийг эмчилдэг болохыг харуулсан өргөн хүрээний эмнэлзүйн судалгаа илрээгүй байна. Харин цэнхэр гэрэл шүүгчтэй нүдний шилний хувьд компьютер ашиглах үеийн нүдний ядаргааг бууруулахад энгийн линзээс илүү үр дүнтэй болохыг нотлох хангалттай баримт байхгүй талаар 2023 оны системчилсэн тойм судалгааны дүгнэлтийг MFCC дурджээ.

Анионтой ариун цэврийн хэрэглэл нь сарын тэмдгийн өвдөлтийг намдаах, эмэгтэйчүүдийн өвчин болон хавдрыг шийдэх зэрэг үр нөлөөтэй гэх сурталчилгааны тухайд мөн ийм нөлөөг баталсан судалгаа, туршилт илрээгүй гэж баримт шалгах төвөөс мэдээлсэн байна.

Ийнхүү энгийн хэрэглээний бүтээгдэхүүнийг өвчин эмгэгийг эмчлэх, эрүүл мэндийн тодорхой үр нөлөөтэй мэтээр сурталчилсан мэдээлэл нь хэрэглэгчийг төөрөгдүүлэх эрсдэлтэй байна. Иймд Монополын эсрэг газраас худалдаа, үйлчилгээ эрхлэгч иргэн, аж ахуйн нэгжүүдийг бараа бүтээгдэхүүнийхээ талаар үнэн зөв мэдээлэл өгөх, хуульд заасан чанар, аюулгүй байдлын шаардлага хангасан бүтээгдэхүүн худалдаалахыг анхааруулжээ. 

Эх сурвалж: Монголын баримт шалгах төв