УИХ дахь Ардчилсан намын бүлгээс “Төсвийн бодлого – Бизнесийн орчин” сэдэвт нээлттэй хэлэлцүүлгийг /2026.09.18/ Төрийн ордонд зохион байгууллаа.

Хэлэлцүүлэгт УИХ-ын гишүүд, эдийн засаг, төсөв, санхүүгийн салбарын мэргэжилтнүүд, бизнесийн төлөөлөл оролцож, сүүлийн жилүүдийн төсвийн бодлого, орлого, зарлагын бүтэц, төсвийн тэлэлтийн эдийн засаг, бизнесийн орчинд үзүүлсэн нөлөөллийг дүгнэн, 2027 оны төсвийн төсөл хувийн хэвшил, хөрөнгө оруулалт, санхүүгийн зах зээл, макро эдийн засгийн тогтвортой байдалд хэрхэн нөлөөлөх талаар санал солилцлоо.

Оролцогчдын байр суурийг хүргэе.  

Эдийн засагч Ц.Лут-Очир: Жилд 28 хувиар тэлсэн энэ төсөв бол цэвэр сонгуульд зориулсан төсөв.
Бизнес эрхлэгчдийн төлөөлөл П.Байгальмаа: Хувийн хэвшилд бол төсөөлөхийн аргагүй, тооцоо судалгаагүй төсөв орж ирж байна. Төр менежер биш гэдгээ харууллаа.

УИХ-ын гишүүн Г.Очирбат: Чөлөөт зах зээлийн 70 хувь нь төрийн болон төрийн хамаарал бүхий компаниудын мэдэлд орчихсон. Төр зах зээлээ эзэлчихсэн энэ нөхцөлд чөлөөт эдийн засаг гэж ярих боломжгүй боллоо.

ШУА-ийн Физик, технологийн хүрээлэнгийн эрдэм шинжилгээний ажилтан, Монгол Улсын Гавьяат багш, физикч Л.Бямбажаргал: Татаастай зээл бол эдийн засгийн эрүүл харилцаа, шударга өрсөлдөөнийг үгүй болгож байгаа гол хүчин зүйл.

Эдийн засагч Н.Туяа: Монголбанк бодлогын хүүгээ нэмэгдүүлсэн учраас одоо өндөр хүүтэй зээл авч, хөрөнгө оруулалт хийх боломжгүй болж байна. Инфляц 12.5 хувь гэж байгаа ч хүнсний бүтээгдэхүүний үнийн өсөлт үүнээс өндөр байна.

Үүний хажуугаар төрөөс олгож буй татаасыг зогсоохгүй бол нэг хэсэг нь татаас авч, нөгөө хэсэг нь давхар татвар төлдөг байдалд хүрчихсэн. Чөлөөт зах зээлийг улам боомилсоор байна.

Ардчилсан Намын Төсөв, санхүү, бүтээмжийн бодлогын зөвлөлийн ахлагч З.Нарантуяа: Орлогын хэт өөдрөг төсөөлөлтэй байна гэдгийг мэргэжлийн байгууллагууд анхааруулж байгаа. Төсвийн орлого тасрахгүй байхад чиглэсэн арга хэмжээг авах ёстой. Ер нь цаашдаа энэ тэлсэн төсвийн орлогыг хэрхэн бүрдүүлэх тал дээр тодорхой бодлого гаргах шаардлагатай гэжээ.