Эдийн засгийн байнгын хорооны хуралдаан эхэллээ.  Өнөөдрийн хуралдаанаар дараах хоёр асуудлыг хэлэлцэнэ. 

1. Монгол Улс болон Азийн Хөгжлийн банк хоорондын санхүүжилтийн ерөнхий төлөвлөгөөний төсөл,
2. Ажлын хэсэг байгуулах тухай Байнгын хорооны тогтоол. Энэ нь 13 гишүүн өргөн мэдүүлсэн "Газрын тосны тухай хууль"д өөрчлөлт оруулах тухай хуулийн төсөл, хамт өргөн мэдүүлсэн хуулийн төслүүдийг хэлэлцүүлэгт бэлтгэх ажлын хэсгийг байгуулах зэрэг асуудлыг хэлэлцэнэ.

Монгол Улс болон Азийн хөгжлийн банк хоорондын санхүүжилтийн ерөнхий төлөвлөгөөний төсөл

Ажлын хэсэгт Сангийн сайд З.Мэндсайхан, Сангийн яамны Санхүү бодлогын газрын дарга С.Тулга Сангийн яамны Санхүүгийн бодлогын газрын өөрөө удирдах хэлтсийн дарга Л.Гантогтох ажиллаж байна.

Сангийн сайд З.Мэндсайхан “Олон улсын геополитикийн хурцадмал нөхцөл байдал нь дэлхийн эдийн засгийн тодорхой эрсдлүүд гарч ирээд байна. Эрчим хүч, хүнсний бүтээгдэхүүний нийлүүлэлт, олон улсын санхүүгийн зах зээлд нөлөөлж байна. Эдгээр гадаад хүчин зүйлс нь инфляц өсгөж, монгол улсын эдийн засагт ч тодорхой эрсдлүүдийг үүсгэж байна. Иймд гадаад нөлөөллийг бууруулах, төсөв, төлбөрийн тэнцлийн сөрөг нөлөөллийг саармагжуулах, шаардлагатай үед шуурхай ашиглах боломжтой санхүүжилтийн эх үүсвэрийг бүрдүүлэх зорилгоор Азийн Хөгжлийн Банктай хамтран 450 сая ам.долларын санхүүжилтийн ерөнхий хөтөлбөрийн төслийг хэлэлцэн боловсруулсан. 2026 оны наймдугаар сарын 19-ны өдөр Засгийн Газрын хуралдаанаар хэлэлцүүлсэн. Энэ хөтөлбөр нь 200 сая ам.долларын төсвийн дэмжлэгийн эх үүсвэр болон 250 сая ам.долларын болзошгүй гамшгийн үеийн зээлийн шугамаас бүрдэнэ.

Өнгөрсөн жилүүдэд Азийн хөгжлийн банкнаас 100 сая ам.доллар хүртэлх төсвийн дэмжлэгийн зээлийг авч ирсэн бол энэ жил 100 сая ам.доллароор нэмэхээр тохирсон. Үүнээс 50 сая ам.долларыг нэн хөнгөлөлттэй нөхцөлөөр олгоно. Харин болзошгүй зээлийн шугамын хувьд эдийн засгийн хямралын үед ашиглах санхүүжилтийн хэрэгслийг нэвтрүүлэхээр холбогдох судалгааг хийж, гэрээ хэлэлцээрийн бэлтгэл ажлыг хангаад байна. Байгалийн гамшиг, эдийн засгийн хямрал, эрчим хүч, хүнсний хангамжийн доголдолтой холбоотой онцгой нөхцөл байдал үүсэн үед цаг алдалгүй санхүүжилтийг татах боломжтой байгаагаар онцлогтой” гэлээ.

Сангийн яамны Санхүү бодлогын газрын дарга С.Тулга "Засгийн Газрын өрийн хэмжээ 2025 оны гүйцэтгэлээр 35.4 их наяд төгрөг буюу ДНБ-ын 39.4 хувьтай тэнцэж байсан. Харин энэ оны эхний хагас жилийн байдлаар 36.2 их наяд төгрөг буюу ДНБ 35.5 хувьтай тэнцэж байна. Энэ оны эцсээр 44.5 хувьтай тэнцэнэ гэж үзэж байна. Энэ зээлийн зорилго маань валютын нөөцийг нэмэгдүүлэх зорилготой. Монгол банкны мэдээлснээр арилжааны банкнууд 500 сая хүртэлх ам.долларын эргэн төлөлт хийгдэнэ. Энэ бол төлбөрийн тэнцэл, валютын нөөц дээр тодорхой хэмжээнд нөлөөтэй учраас эерэг үзүүлэлт гарна. Нөгөө талдаа шууд төрийн сангийн мөнгөн хөрөнгийн нэмэгдүүлнэ. Улирлын чанартай мөнгөн хөрөнгийг нөхөх ач холбогдолтой. Энэ оны 10 сард батлагдчихвал 11 болон 12 сардаа ашиглах боломжтой гэж тооцоолж байна. Жил гаруй хугацаанд АХБ-тай хамтарч, хөөцөлдсөн" гэв.