Люксембургийн Их Гүнт Улсын Үндэсний Зүрх Судлал, Зүрх Судасны Мэс Заслын Хүрээлэн болон НҮБ-ын Хүн амын сангийн хамтран “ЭХЭМҮТ-д хүүхдийн зүрхний мэс заслыг нэвтрүүлэх нь” төслийг хэрэгжүүлж байна.

Төслийн багийнхан өнөөдөр Эх, Хүүхдийн Эрүүл Мэндийн Үндэсний Төв (ЭХЭМҮТ)-д ажиллав.

Төслийн зөвлөх Arnaud Charpentier, биоанагаахын инженер Roberto Cattarinussi, НҮБ-ын Хүн амын сангийн төлөөлөгч Б.Шинэтөгс нар ЭХЭМҮТ-ийн удирдлагуудтай санал солилцжээ.

Уулзалтын үеэр төслийн 2026 оны үйл ажиллагааны төлөвлөгөөг хэлэлцэж, цаашид хамтран ажиллах боломж, хэрэгжүүлэх арга хэмжээний талаар ярилцав.

Түүнчлэн төслийн баг 2026 оны 4, 8, 10 дугаар сард хүүхэд, нярайд зүрхний  мэс засал хийх бэлтгэл ажлыг хангахаар ажиллаж байна. Үүнд шаардлагатай эм, эмнэлгийн хэрэгсэл, тоног төхөөрөмжийн бэлэн байдлыг шалгах, мэргэжлийн багийн бэлтгэлийг хангах зэрэг ажил багтана.

Энэхүү төсөл хэрэгжсэнээр хүүхэд, нярайн зүрхний нарийн мэс заслыг Монгол Улсад дотооддоо хийх боломж бүрдэж, иргэд гадаад улсад өндөр өртгөөр эмчлүүлэх шаардлага буурах ач холбогдолтой юм.

Эх сурвалж: ЭХЭМҮТ