УИХ-ын чуулганы хурлаар Эрхтэн, эд, эс шилжүүлэн суулгах тухай хуулийн төсөл болон хамт өргөн мэдүүлсэн хуулийн төслүүдийн эцсийн хэлэлцүүлгийг хийж байна. Гишүүд асуулт асууж, хариулт авч байна. 

Энэ үеэр УИХ-ын гишүүн С.Эрдэнэболд "Үзэл баримтлалын хувьд дэмжиж байна. Харин 15.6 дээр Холбогдох эрүүл мэндийн байгууллагын дүгнэлтээр өөрөө жирэмслэх, ураг тээх, хүүхэд төрүүлэх чадваргүй нь тогтоогдсон нөхцөлд тээгч эхээр дамжуулан хүүхэд төрүүлэхийг зөвшөөрөх бөгөөд бусад тохиолдолд тээгч эх ашиглахыг хориглоно гэж заажээ. 

Үүн дээр олон улсын туршлага ямар байдаг вэ? Яагаад заавал хориглоод байгаа вэ? Хүний эрх талаас асуудалтай биш үү? Хүчээр ингэж зааж болох уу" гэсэн асуултыг тавилаа. 

Түүний асуултад ЭМХТ-ийн Эс, эд эрхтэн шилжүүлэн суулгах төвийн үйл ажиллагаа зохицуулах албаны дарга Б.Алтантулга "Хуулийн төсөл дээр ч, одоо мөрдөгдөж байгаа Донорын тухай хуульд ч тээгч эх ашиглах бол тухайн эмэгтэй өөрөө жирэмсэн болох боломжгүй нь холбогдох эрүүл мэндийн байгууллагаар батлагдсан байх ёстой гэж тусгасан. 

Олон улсад хэд хэдэн туршлага байна. Бүх нөхцөлд тээгч эх ашиглахыг зөвшөөрсөн ч улс байна. Зарим нь зөвхөн эрүүл мэндийн шалтгаантай ч байна. 

Монгол Улсад үр шилжүүлэн суулгах таван эрүүл мэндийн байгууллага байдаг. Эдгээр байгууллагын төлөөлөлтэй уулзаад тээгч эхийг ашиглах тохиолдол нь ямар байдгийг ярилцсан. 

Нэг ёсондоо тухайн эмэгтэй гоо сайхны шалтгаанаар эсвэл өөрөө тээхгүй гээд хүүхэд тээхгүй байх боломжгүй гэсэн үг юм" гэв. 

УИХ-ын гишүүн Б.Баярбаатар "Бид Хүний эрхийн үндэсний комиссоос санал аваад 22 заалт ирүүлснийг бүгдийг нь тусгасан. Яг энэ асуудалд бол ямар нэг санал ирүүлээгүй" гэсэн хариулт өглөө.