Дэлхийн циркчдийн “олимп” хэмээн алдаршсан Монакогийн Гүнт Улсын Монте-Карло хотод зохион байгуулагддаг олон улсын А зэрэглэлийн циркчдийн 48 дахь удаагийн наадам амжилттай зохион байгуулагдлаа.

Тус наадамд МУГЖ Л.Энхцэцэг багшийн “Angels”, АЖ, Төрийн шагналт, Хөдөлмөрийн баатар Б.Норовсамбуу багшийн “Хүн Сарнай”, СТА Б.Янжинбилэг багшийн “Pyramid School of Circus Arts”, Б.Эрдэнэцэцэг багшийн “Цэцэгс” уран нугаралтын төвийн 13 шилдэг нугараач хамтран,  “Lodoi Girls” баг болон оролцжээ.

Ийнхүү Монголын уран нугараачид МУГЖ Л.Энхцэцэгийн дэглэлтээр Монте-Карлогийн олон улсын циркчдийн наадмаас “Хүрэл алиалагч” цом хүртлээ.

Энэхүү амжилтыг үнэлж, Соёл, спорт, аялал жуулчлал, залуучуудын яамнаас тус багийн уран бүтээлчдийг МУСТА цол, тэмдгээр шагнасан юм.