Эдийн засгийн байнгын хорооны өнөөдрийн хуралдаанаар Монгол Улс, Холбооны Бүгд Найрамдах Герман Улсын /ХБНГУ/ Сэргээн босголтын зээлийн банк хоорондын “Төвийн бүсийн цахилгаан дамжуулах, түгээх сүлжээний үр ашгийг дээшлүүлэх төслийн III үе шат”-ны зээлийн болон төслийн хэлэлцээрийн төслийг зөвшилцөх асуудлыг хэлэлцэв.

Төслийн хүрээнд дэвшилтэд технологиор зай талбайд хэмнэлттэй 110 кВ -ийн GIS (Gas-Insulated Switchgear) хаалттай хуваарилах байгууламжтай дэд станцыг Сүхбаатар дүүрэгт барьж байгуулна. 

Төслийг ХБНГУ-ын Сэргээн босголтын зээлийн банк /KFW/-аас 17 сая еврогийн зээлийн хөрөнгөөр санхүүжүүлэхээр төлөвлөж байгаа бөгөөд дэд станц байгуулснаар Сүхбаатар, Чингэлтэй, Баянгол, Хан-Уул, Баянзүрх дүүргийн 14 хороо, Улсын төв 1, 2 дугаар эмнэлэг, Өргөө амаржих газар зэрэг нийт 11 мянга гаруй хэрэглэгчийн цахилгаан эрчим хүчний хангамжийн найдвартай ажиллагаа дээшилж, иргэн болон аж ахуйн нэгжийн хүлээгдэж буй 49.4 МВА чадлын хүсэлт хангагдах юм байна.

Зээлийн хэлэлцээрийн төслийг Эдийн засгийн байнгын хорооны хуралдаанаар дэмжин Аюулгүй байдал, гадаад бодлогын байнгын хороонд хүргүүлэхээр тогтжээ. 

Эх сурвалж: Монгол Ардын Намын бүлэг