Бүгд Найрамдах Болгар Улс жил бүрийн тавдугаар сарын 24-ний өдөр Гэгээн Кирилл, Мефодий, Болгарын цагаан толгой, боловсрол, соёл болон слав бичиг үсгийн өдрийг тэмдэглэдэг уламжлалтай.

Тэгвэл тус арга хэмжээг Бүгд Найрамдах Болгар Улсын Элчин Сайдын Яамны Хэргийг түр хамаарагч хатагтай Александрина Гигова болон Улаанбаатар группийн ТУЗ-ийн дарга, Монгол-Болгарын эдийн засаг, соёлын холбооны үндэслэн байгуулагчдын нэг Ц.Батбаатар нар санаачлан зохион байгуулсан байна.

Монгол-Болгарын эдийн засаг, соёлын холбоо нь сүүлийн хоёр жилийн хугацаанд Улаанбаатар хот дахь Бүгд Найрамдах Болгар Улсын Элчин сайдын яамтай хамтран хоёр улсын эдийн засаг, соёлын хамтын ажиллагааны чиглэлээр уулзалт, нээлттэй хэлэлцүүлгүүдийг зохион байгуулж иржээ.

Тус төрийн бус байгууллагын гол зорилго нь Монгол, Болгар хоёр улсын эдийн засаг, соёлын хамтын ажиллагааг өргөжүүлэх, худалдаа, хөдөө аж ахуй, боловсрол, соёлын салбарын харилцааг хөгжүүлэх, хамтарсан төсөл, хөтөлбөрүүдийг хэрэгжүүлэхэд чиглэж буйг тус тэмдэглэлт өдрөөр Улаанбаатар группийн ТУЗ-ийн дарга, Монгол-Болгарын эдийн засаг, соёлын холбооны үндэслэн байгуулагчдын нэг Ц.Батбаатар онцолсон  байна.

Энэ жилийн баярын арга хэмжээнд Бүгд Найрамдах Болгар Улсын Элчин Сайдын Яам, Монгол Улсын Их Хурал дахь Монгол-Болгарын парламентын бүлгийн дарга, УИХ-ын гишүүн Ц.Сандаг-Очир, олон улсын дипломат төлөөлөгчид, элч төлөөлөгчид, Монгол-Болгарын эдийн засаг, соёлын холбоо, Монгол-Болгарын найрамдлын нийгэмлэгийн төлөөлөл, Болгарт төгсөгчид болон Нийслэлийн Ерөнхий боловсролын 118 дугаар сургуулийн төлөөлөгчид зэрэг салбарын томоохон төлөөлөгчид оролцож, хоёр улсын боловсрол, соёлын хамтын ажиллагааны түүхийг онцлон тэмдэглэлээ.

Монгол Улс болон Бүгд Найрамдах Болгар Улс 1950 оны дөрөвдүгээр сарын 22-ны өдөр дипломат харилцаа тогтоосон түүхтэй.

Хоёр улсын боловсролын хамтын ажиллагааны хүрээнд анхны монгол оюутан 1957 онд Болгар Улсад дээд боловсрол эзэмшихээр очсоноос хойш 800 гаруй монгол иргэн тус улсад суралцжээ. Мөн 80 орчим судлаач Болгар Улсад эрдмийн зэрэг хамгаалсан байна. Болгар Улсад боловсрол эзэмшсэн монгол иргэд эх орныхоо хөгжил, бүтээн байгуулалтад үнэтэй хувь нэмэр оруулсан бөгөөд тэдний дундаас Хөдөлмөрийн баатар 1, Төрийн шагналтан 2, Академич 1, Ардын болон Гавьяат цолтон 34 хүн төрөн гарсан байна.

Арга хэмжээний үеэр кирилл үсгийг Монгол төдийгүй дэлхийн олон орныг холбосон соёл, түүхийн “амьд гүүр” хэмээн онцолж, Европын Холбооны албан ёсны бичгийн нэг болсныг тэмдэглэлээ.