УИХ-ын гишүүн, Ерөнхий сайд асан Л.Оюун-Эрдэнэ УИХ-ын даргыг томилох асуудлаар Төрийн ордонд мэдээлэл өгөв.

Тэрээр, Одоо бид хамтдаа олон намын тогтолцоо руу шилжиж байгаа. Сонгодог парламентын засаглалынхаа зарчим руу явах нь л зөв гэж бодож байна. Учир нь гурав дахь спикер буюу гурав дахь УИХ-ын дарга дээр гацаж байгаа шалтгааныг та бүхэн мэдэж байгаа байх.

УИХ-ын даргын суудалд очсон хүн 2027 оны Ерөнхийлөгчийн сонгуульд нэр дэвших магадлалтай гэдэг өнцгөөс хоорондоо өрсөлдөөд, гацаагаад байна. Тэгснээс өөр ямар ч зүйл байхгүй. Ингэх юм бол дахиад л гурав дахь УИХ-ын дарга огцорно. Учир нь УИХ-ын даргын индэр дээрээс Ерөнхийлөгчийн сонгуульд бэлтгэлээ хангана гэдэг нь өөрөө дахиад л таван намд тэгш бус хандана гэсэн үг шүү дээ.

Улс төрийн нөхцөл байдлыг зөв үнэлээд дараагийнхаа хүнийг эвгүй байдалд оруулахгүйн тулд нам бус болгоод хуралдаан зохион байгуулдаг зүйл рүү нь яваасай. Үүнийг 126 гишүүнтэй болох өөрчлөлтийг оруулж байхад Г.Занданшатар даргад би хэлж байсан боловч сонгууль дөхчихсөн.

Холимог тогтолцоотой парламент нь соёлын том өөрчлөлтийг авчирч байгаа. Иймд УИХ-ын даргад нэр дэвшиж байгаа хүмүүс шуналаа жоохон хойш нь татаж, том агуулгаар харж, маргааш ирж болзошгүй эрсдэлээс гарахын тулд хамтдаа сонгодог парламентын засаглалаа бэхжүүлэхийн тулд дахиад нэг алхчихъя гэж хэлмээр байна.

УИХ-ын дарга болох хүн нам бус байг, Ерөнхийлөгчийн сонгуульд нэр дэвшихгүй байг, аль нэг намд үйлчилдэггүй байг, нэг намын бүлгээс чиглэл авдаггүй хүн байг" гэв.