Өнгөрсөн жилээс иргэд Өмнөговь аймгийн Гурвантэс сумын Гүн гэдэг газраас улаан өнгөтэй чулуу их хэмжээгээр түүн, Хятад руу нууцаар гаргаж эхэлсэн. Энд барагцаагаар 3000 хүн цуглан, газрыг хайр найргүй сэндийлэн, газар доогуур нүхэн хонгил ухсанаас нэг хүн нурангид дарагдан амиа алдаж, хоёр хүн бэртэж гэмтсэн удаатай.

Гурвантэс сумын жирийн иргэд төдийгүй төрийн албан хаагчид хүртэл тэнд очин чулуу олборлодог болж, эмх замбараагүй байдал үүссэн юм байна. Иргэд олборлосон чулуугаа нууцаар хил давуулах гээд зарим нь баригдаж, торгуулан, машинаа хураалгасан. Олон хүн бөөгнөрсөн тэр газар архидалт, гэмт хэргийн үүр болсон тул иргэдийг тараалгахаар цэрэг, цагдаа дайчилсан ч хүчрээгүй аж. Үүнд сар бүр аймгийн төсвөөс долоон сая төгрөг зарлагадаж иржээ. Гэсэн ч ямар ч үр дүнд хүрээгүй тул тус аймгийн Засаг дарга саяхан шийдвэр гарган, “Баатар ван транс” гэдэг компанид уг газарт хайгуул хийх зөвшөөрөл гурван жилийн хугацаатай олгожээ.

Гүн хэмээх газар нь ашигт малтмал хайх, ашиглахыг хязгаарласан буюу хориглосон, тусгай хэрэгцээ, нөөцөд авсан, хайгуулын тусгай зөвшөөрөл олгосон, улсын төсвийн хөрөнгөөр хайгуул хийсэн талбайн жагсаалтад байгаа эсэхийг Ашигт малтмалын газраас тодруулсны үндсэн дээр ийм зөвшөөрөл олгосон аж. Улаан хас гээд байгаа чулуу нь үнэхээр хагас үнэт чулуу мөн эсэхийг тогтоолгох, мөн нөөцийг нь бодуулах, түүнийг ашиглан орон нутагтаа үйлдвэрлэл хөгжүүлэх, иргэдээ ажилтай болгох зорилгоор ийм шийдвэр гаргасан гэнэ.

Х.Эрхэм